Revelasyon 9 - Labib An Kreol Seselwa

¹ En senkyenm lanz ti soufle dan son tronpet. Alor, mon ti war en zetwal sorti dan lesyel e tonm lo later. Zot ti donn li lakle labim, sa trou san fon.

² Sa zetwal ti ouver labim e en lafimen ti monte sorti dan pwi, parey lafimen en gran fourno. Soley ek ler ti vin sonm avek sa lafimen ki ti sorti dan sa pwi.

³ Dan sa lafimen, en kantite sotrel ti sorti e fannen lo later. Zot ti ganny en pouvwar parey pouvwar bann skorpyon.

⁴ Bann sotrel ti ganny lord pour pa fer dimal zerb lo later, ni pye dibwa, ni okenn plant, me zis bann zonm ki pa ti'n ganny marke avek sele Bondye lo zot fron.

⁵ Sa bann sotrel pa ti ganny permisyon pour touy sa bann zonm, me zis pour tourmant zot pandan senk mwan. Sa douler ki zot ti provoke ti parey pike skorpyon.

⁶ Pandan sa senk mwan, dimoun pou rod lanmor, me zot pa pou trouv li. Zot pou anvi mor, me lanmor pou sov lwen avek zot.

⁷ Sa bann sotrel ti parey bann seval ekipe pour konba. Lo zot latet ti annan sa ki ti paret koman bann kouronn annor. Zot figir ti parey figir en imen.

⁸ Zot seve ti parey seve fanm. Zot ledan ti parey ledan lyon.

⁹ Lo zot pwatrin ti annan konmsi bann plak feray. Tapaz zot lezel ti konmsi bann kales ki ti pe ganny trennen par plizyer seval ki pe al lager.

¹⁰ Zot ti annan lake parey skorpyon arme avek bann dart. Pouvwar fer ditor bann zonm pandan senk mwan ti dan zot lake.

¹¹ Zot ti annan en lerwa ki ti diriz zot. I ti apel Lanz labim, Abadonn, dan lalang Ebre e Apolyonn dan lalang Grek.

¹² Premye maler ti'n pase. De lezot maler ti pe vini.

¹³ Alor, sizyenm lanz ti soufle dan son tronpet. Mon ti antann en lavwa sorti kot sa kat korn lotel annor ki devan Bondye.

¹⁴ Sa lavwa ti dir avek sa lanz: Larg sa kat lanz ki'n ansennen kot gran larivyer Efrat.

¹⁵ I ti larg sa kat lanz ki ti pare pour sa ler, sa zour, sa mwan e sa lannen, pour detri en tyer zabitan later.

¹⁶ Mon ti antann dir ki ti annan 200 milyon konbatan.

¹⁷ Dan mon vizyon, la ki mannyer mon ti war bann seval avek zot bann kavalye: Bann kavalye ti port lenz lager kouler rouz koman dife, ble koman pyer safir, e zonn koman souf. Latet bann seval ti koman latet lyon. Dife, lafimen ek souf ti sorti dan zot labous.

¹⁸ En tyer zabitan later ti ganny detri par sa trwa fleo: Dife, lafimen ek souf ki ti sorti dan zot labous.

¹⁹ Annefe, pouvwar sa bann seval ti dan zot labous e dan zot lake ki ti parey bann serpan. Zot ti bles dimoun avek zot latet.

²⁰ Lezot zonm ki pa ti ganny touye par bann fleo, pa ti abandonn sa ki zot ti'n fer. Zot pa ti aret ador bann demon ek bann zidol annor, annarzan, an bronz, an pyer e an bwa ki pa kapab ni war, ni tande, ni marse.

²¹ Zot pa ti regret ni zot krim, ni zot pratik siperstisye, ni zot pratik imoral, ni zot bann vol.