Psonm 92 - Labib An Kreol Seselwa

En Kantik Louanz pour Zour Saba

¹ I bon pour remersye SENYER, e sant pour ou non, Bondye Treo!

² Pour anons ou lanmour bomaten e ou fidelite aswar

³ avek lenstriman lanmizik dis lakord, laarp ek lanmizik sitar.

⁴ SENYER! Ou bann mervey i donn mwan lazwa. Mon sant dan lazwa pour travay ki ou'n fer avek ou lanmen.

⁵ Ou'n fer en kantite gran mervey. Ou bann travay i vreman gran, SENYER! Ou bann panse i tre profon.

⁶ Dimoun bet pa konn nanryen. Sa enn ki fou pa konpran nanryen.

⁷ Menm si bann malfeter i pous parey move zerb e bann ki fer sa ki mal i prospere, zot pou ganny detri pour touzour.

⁸ Me ou lao! Ou SENYER pour touzour.

⁹ SENYER! Ou bann lennmi, wi, ou bann lennmi pou ganny detri. Tou bann malfeter pou ganny disperse.

¹⁰ Ou'n fer mwan for parey en toro sovaz; ou'n vers delwil parfimen lo mwan.

¹¹ Mon'n war mon bann lennmi tonbe; mon'n antann bann ki atak mwan kriye.

¹² Sa enn ki obei Bondye i grandi parey en pye palm; i pouse parey en pye sed dan Liban.

¹³ I parey en pye dibwa ki'n ganny plante dan tanp SENYER. I fleri dan lakour tanp nou Bondye.

¹⁴ I kontinyen donn bann fri menm dan lavyeyes. I reste ver e ranpli avek lasev,

¹⁵ e proklanmen ki SENYER i drwat. Li menm mon ros protekter e dan li napa okenn lenzistis.