Psonm 90 - Labib An Kreol Seselwa

Frazilite Imen

Lapriyer Moiz.

¹ SENYER! Depi touzour, ou nou labri.

² Avan ki ou ti kree bann montanny, avan ki ou ti form later ek lemonn, depi touzour e pour touzour, ou Bondye!

³ Ou fer bann imen retourn dan lapousyer; ou dir zot: Retourn kot ou sorti.

⁴ Pour ou, mil an i pas konmsi yer, oubyen parey en kourt letan dan lannwit.

⁵ Ou balye zot parey en sonmey ki pase, parey zerb ki pouse bomaten.

⁶ Bomaten i fleri, i fini; aswar, i fannen e i sek.

⁷ Ou lakoler i detri nou. Ou lakoler vyolan i fer nou tranble.

⁸ Ou'n met nou bann fot devan ou. Nou bann pese sekre i ganny devwale devan ou lalimyer.

⁹ Nou lavi i ganny rakoursi anba ou lakoler. Nou lavi i fini parey en souf.

¹⁰ Nou lavi i dir zis pour 70 an, parfwa 80 an pour bann ki pli for; me nou konn zis traka ek lapenn; zot pas vit e nou anvole.

¹¹ Lekel ki kapab konn lafors ou lakoler? Nou lafreyer i osi gran ki ou lakoler.

¹² Alor, fer nou konpran ki nou lavi i kourt, pour ki nou leker i ranpli avek lasazes.

¹³ Retournen SENYER! Ziska kan? Pran pitye pour ou bann serviter.

¹⁴ Ranpli nou avek ou fidelite depi bomaten, pour ki nou ava zwaye e sante tou nou lavi.

¹⁵ Pandan en kantite lannen ou'n pini nou. Fer nou rezoui pour otan lannen e otan zour ki nou'n pas dan maler.

¹⁶ Fer ou bann serviter war bann mervey ki ou'n akonpli e nou bann zanfan ava dekouver ou laglwar.

¹⁷ SENYER nou Bondye! Devers ou benediksyon lo nou. Fer prospere tou travay ki nou fer. Wi! Fer prospere tou travay ki nou fer.