Psonm 85 - Labib An Kreol Seselwa

Lapriyer pour Demann Byennet Nasyon

Psonm lafanmir Kore.

¹ SENYER! Ou'n montre ou lanmour anver ou pei; ou'n retabli sityasyon Zakob.

² Ou'n efas bann fot ou pep; ou'n pardonn zot tou zot pese.

³ Ou'n aret ankoler; ou'n abandonn tou lakoler ki ou ti annan kont nou.

⁴ Bondye nou Sover! Retabli nou. Renons ou lakoler kont nou.

⁵ Eski ou pou ankoler kont nou pour touzour? Eski ou pou ankoler kont bann zenerasyon fitir?

⁶ Eski ou pa pou fer nou reviv e fer ou pep retrouv son lazwa?

⁷ SENYER! Montre ou fidelite anver nou e sov nou.

⁸ Mon pou ekout sa ki SENYER Bondye i annan pour li dir. I promet lape pour son pep, pour dimoun ki reste fidel anver li, me ki pa retonm dan menm betiz.

⁹ SENYER i pare pour sov sa enn ki obei li, pour ki son laglwar i reste dan pei.

¹⁰ Labonte ek fidelite ava zwenn ansanm; lazistis ek lape ava anbras kanmarad.

¹¹ Fidelite ava monte sorti dan later e depi lesyel, lazistis ava get anba lo later.

¹² SENYER ava li menm anmenn boner e nou pei ava prodwir plis.

¹³ Lazistis ava mars devan li e tras en semen pour li.