Psonm 83 - Labib An Kreol Seselwa

Lapriyer pour Laviktwar

¹ Mon Bondye! Pa gard silans. Mon Bondye! Pa reste trankil san nanryen fer.

² La ou bann lennmi pe revolte; dimoun ki ay ou pe vir kont ou.

³ Zot pe fer konplo kont ou pep; zot pe met zot ansanm kont ou bann proteze.

⁴ Zot dir: Vini! Annou fer zot disparet koman en nasyon; fer sa non Izrael ganny oubliye pour touzour.

⁵ Ansanm, zot in fer konplo; zot in fer en lalyans kont ou:

⁶ Bann zabitan Edonm ek bann Ismaelit, zabitan Moab ek bann zanfan Agar;

⁷ zabitan Gebal, Amonn ek Amalek, Filisten ek zabitan Tyr.

⁸ Menm bann Asiriyen in zwenn zot; zot vin donn koudmen bann zanfan Lot.

⁹ Tret zot parey ou ti fer avek Madyann, parey avek Sisera ek Zabin obor larivyer Kisonn.

¹⁰ Zot ti ganny detri Andor e ganny servi koman fimyen pour angres later.

¹¹ Tret zot bann sef parey Horeb ek Zeeb; tou zot bann dirizan parey Zeba ek Zalmouna

¹² ki ti dir: Annou pran propriyete ki pour Bondye.

¹³ Mon Bondye! Fer zot fannen parey lapay dan divan;

¹⁴ parey dife ki devor lafore; parey laflanm ki bril bann montanny.

¹⁵ Pourswiv zot dan tanpet, fer zot per avek bann koudvan.

¹⁶ SENYER! Fer zot kanmi; konmsa, zot ava rekonnet ou non.

¹⁷ Kouver zot avek laont e fer zot tranble pour touzour; e zot ava mor dan gran dezoner!

¹⁸ Konmsa, zot ava konnen ki ou menm sel SENYER, Bondye Treo, lo later antye.