Psonm 78 - Labib An Kreol Seselwa

Bondye ek Son Pep

Poenm Asaf.

¹ Mon pep! Ekout mon lansennyman. Ekout sa ki mon annan pou dir zot.

² Mon pou koz avek zot an parabol; mon pou eksplik zot bann proverb dan letan pase.

³ Bann keksoz ki nou'n antann e ki nou konnen, ki nou bann zanset i'n rakont nou,

⁴ nou pa pou kasyet avek nou bann zanfan. Nou pou rakont bann zenerasyon fitir, bann mervey ki SENYER in fer avek son lafors e bann gran mervey ki i'n fer.

⁵ I'n donn pep Zakob en komannman; in fikse en lalwa dan Izrael. I ti ordonn nou bann zanset pour fer zot bann zanfan konnen.

⁶ Konmsa, zenerasyon fitir ava konnen e rakont avek zot bann zanfan.

⁷ Zot ava met zot lespwar dan Bondye; zot pa pou oubliy tou sa ki Bondye in fer, me zot ava obei son komannman.

⁸ Alor, zot pa pou devre fer parey zot bann zanset ki ti en zenerasyon rebel e dezobeisan, ki zanmen ti vreman met zot konfyans dan Bondye. Zot lespri pa ti fidel avek Bondye.

⁹ Tribi Efraim, arme avek fles, ti tourn ledo e sove zour lager.

¹⁰ Zot pa ti gard lalyans Bondye; zot ti refize swiv son lalwa.

¹¹ Zot ti oubliy tou sa ki i ti'n fer, e tou bann mervey ki i ti montre zot.

¹² I ti fer en bann mervey devan zot bann zanset, dan laplenn Zoann, kan zot ti dan pei Lezip.

¹³ I ti separ lanmer an de pour fer zot traverse; i ti fer delo debout parey en miray.

¹⁴ Lizour, i ti gid zot par nyaz e lannwit, par dife.

¹⁵ Dan dezer, i ti fann ros an de pour donn zot delo annabondans, sorti dan profonder later.

¹⁶ I ti fer bann sours delo sorti dan ros e fer delo koule parey en gran larivyer.

¹⁷ Me zot ti kontinyen fer pese kont Bondye e zot ti revolte kont Bondye Treo dan dezer.

¹⁸ Zot ti provok Bondye dan zot leker e demann li satisfer zot lapeti.

¹⁹ Zot ti koz kont Bondye kan zot ti dir: Eski Bondye i kapab donn nou manze dan dezer?

²⁰ I vre ki i ti tap lo ros pour fer delo koule annabondans, koman en larivyer. Me eski i pou osi kapab donn nou dipen oubyen donn son pep lavyann pour manze?

²¹ Alor, SENYER ti ankoler kan i ti antann sa. I ti alim en dife kont Zakob. Son lakoler ti monte kont Izrael.

²² Zot pa ti krwar dan Bondye. Zot pa ti met zot konfyans dan pwisans son delivrans.

²³ Pourtan, i ti donn lord bann nyaz lao dan lesyel e ouver bann laport lesyel.

²⁴ I ti fer tonbe lamann depi lesyel. I ti donn zot dipen sorti dan lesyel pour nouri zot.

²⁵ I ti donn imen dipen ki bann lanz i manze. I ti anvoy zot manze annabondans.

²⁶ I ti fer soufle divan sorti dan Les. Avek son pwisans, i ti fer soufle divan sorti dan Sid.

²⁷ I ti fer lavyann tonm lo zot parey lapousyer, e zwazo, parey disab obor lanmer.

²⁸ I ti fer zwazo tonbe partou dan kan e otour zot bann abitasyon.

²⁹ Alor, zot ti manze ziska ki zot ti rasazye. Bondye ti'n donn zot sa ki zot ti anvi.

³⁰ Me avan zot ti fini, manze ti ankor dan zot labous,

³¹ lakoler Bondye ti mont kont zot. I ti touy bann ki ti pli for parmi zot e fer tonbe bann meyer zennzan dan Izrael.

³² Malgre tousala, zot ti kontinyen fer pese. Zot pa ti krwar dan son bann mervey.

³³ Alor, i ti fer zot lavi pase parey divan e zot lavi ti fini dan dezas.

³⁴ Kan i ti touy zot, lezot ti rod li. Zot ti repanti, zot ti vitman retourn kot Bondye.

³⁵ Zot ti rapel ki Bondye i zot Ros protekter, Bondye Treo ti zot Sover.

³⁶ Me zot ti tronp li avek zot labous. Zot lalang ti prodwir zis mansonz.

³⁷ Zot leker pa ti vreman atase avek li. Zot pa ti reste fidel anver son lalyans.

³⁸ Pourtan, dan son konpasyon i ti pardonn zot, zot pese e i pa ti detri zot. Souvan, i ti retenir son lakoler, e i pa ti les sape son firer.

³⁹ I ti rapel ki zot zis bann imen, parey en divan ki pase e i pa retournen.

⁴⁰ Souvan dan dezer, zot ti rebel kont li. Souvan zot ti ofans li dan dezer.

⁴¹ Plizyer fwa zot ti teste Bondye e ofans Bondye Sen Izrael.

⁴² Zot ti oubliy sa ki i ti'n fer pour zot, sa zour ki i ti delivre zot kont zot ladverser:

⁴³ I ti montre bann siny etonan dan Lezip, bann mirak dan laplenn Zoann.

⁴⁴ I ti fer delo bann larivyer vin disan e bann Ezipsyen pa ti kapab bwar.

⁴⁵ I ti anvoy lo zot bann lesen mous ki ti devor zot e grenouy ki ti detri zot.

⁴⁶ I ti fer bann kasbol devor zot rekolt e donn prodwi zot travay bann sotrel.

⁴⁷ I ti detri zot plantasyon rezen par lagrel. Zot bann fig sovaz ti ganny devaste par gro lafreser.

⁴⁸ I ti les zot zannimo ganny detri par lagrel e zot betay par loraz ek zekler.

⁴⁹ Bondye ti anvoy lo zot son pli gran lakoler: En lakoler feros ek maler, ti vin lo zot, parey lanz lanmor.

⁵⁰ I ti tir tou son lakoler. I pa ti eparny zot kont lanmor, me i ti touy zot par en lepidemi.

⁵¹ I ti touy tou bann zanfan premye ne dan Lezip ki sorti dan premye fri lafors Kanm.

⁵² Apre sa, i ti fer sorti son pep koman en troupo e gid zot dan dezer koman bann mouton.

⁵³ I ti anmenn zot an sekirite. Zot pa ti bezwen per kan lanmer ti ferm lo zot bann lennmi.

⁵⁴ I ti anmenn zot dan son pei sen, kot sa montanny ki i ti pran avek son lanmen drwat.

⁵⁵ I ti sas bann nasyon devan zot. I ti partaz pei e donn sakenn son par e enstal bann tribi Izrael dan zot latant.

⁵⁶ Me zot ti teste Bondye Treo e rebel kont li; zot pa ti obei son bann komannman.

⁵⁷ Me parey zot zanset, zot ti pran move semen. Zot pa ti reste fidel; Bondye pa ti kapab kont lo zot.

⁵⁸ Zot ti provok li avek zot bann landrwa sakre e rann li zalou avek zot bann zidol.

⁵⁹ Bondye ti ankoler kan i ti antann sa e i ti abandonn pep Izrael.

⁶⁰ I ti abandonn son demer Silo, landrwa kot i ti reste parmi bann imen.

⁶¹ I ti les Kof Lalyans, ki siny son pwisans ek son laglwar dan lanmen bann lennmi.

⁶² I ti telman ankoler kont son pep, ki i ti les zot ganny masakre par lennmi.

⁶³ Bann zennzan ti ganny devore par dife. Personn pa ti sant romans pour bann zenn fiy.

⁶⁴ Bann pret ti ganny masakre; bann vev pa ti kapab fer tande zot lamantasyon.

⁶⁵ Apre sa, SENYER ti leve konmsi sorti dan en sonmey, parey en gerye ki ti'n bwar tro diven.

⁶⁶ I ti atak son bann lennmi ki ti pe sove. I ti fer zot tonm dan laont pour touzour.

⁶⁷ I ti rezet bann desandan Zozef; i pa ti swazir tribi Efraim,

⁶⁸ me i ti swazir tribi Zida, montanny Siyon ki i kontan.

⁶⁹ La, i ti konstri son sanktyer parey sa enn ki lo montanny. I ti fer son fondasyon solid pour touzour, parey later.

⁷⁰ I ti swazir David koman son serviter; i ti al sers li parmi bann mouton.

⁷¹ I ti pran li parmi bann troupo pour fer li vin berze son pep Zakob e Izrael son patrimwann.

⁷² David ti pran swen son pep avek gran ker; i ti gid zot avek en lanmen abil.