Psonm 44 - Labib An Kreol Seselwa

Lapriyer pour Demann Proteksyon

Pour sef lakoral. En poenm sorti kot fraternite Kore.

¹ Mon Bondye! Nou'n antann avek nou prop zorey. Nou zanset in rakont nou tou bann gran keksoz ki ou ti fer a lepok:

² Avek ou lafors, ou ti sas bann nasyon pour etabli nou zanset. Ou'n kraz bann nasyon pour fer ou pep grandi.

³ Pa avek zot lepe ki zot ti ganny sa pei; pa avek zot lafors, ki zot ti ganny laviktwar. Me par ou lanmen, par ou lafors, par lalimyer ou prezans, akoz ou ti kontan zot.

⁴ Mon Bondye! Ou ki mon lerwa. Donn laviktwar Zakob.

⁵ Par ou, nou repous nou bann lennmi. Par ou, nou kraz bann ki atak nou.

⁶ Mon pa met mon konfyans dan mon fles; mon lepe pa pour kapab donn mwan laviktwar.

⁷ Ou ki'n sov nou kont nou bann lennmi. Ou'n fer dimoun ki imilye nou perdi zot loner.

⁸ Tou le zour, nou sant louanz pour Bondye e loue son non pour touzour.

⁹ Me ou'n rezet nou; ou'n les nou ganny imilye. Ou nepli akonpanny nou larme dan konba.

¹⁰ Ou fer nou rekile devan lennmi e zot in depouy nou, mannyer zot oule.

¹¹ Ou'n livre nou parey bann mouton pour labatwar. Ou'n dispers nou parmi lezot nasyon.

¹² Ou'n vann ou pep pour nanryen, san fer okenn profi.

¹³ Ou'n les bann vwazen ridikiliz nou. Dimoun otour nou in mepriz nou; zot in gognard nou.

¹⁴ Zot rakont fab lo nou. Zot riy nou e zot sekwe latet.

¹⁵ Tou lazournen, mon maler i devan mwan. Mon figir i kouver avek laont,

¹⁶ ler mon antann mon lennmi ek sa bann ki ay mwan, pe provok mwan, pe ensilte mwan.

¹⁷ Tousala in ariv nou. Pourtan, nou pa'n oubliy ou, nou pa'n zanmen trai ou lalyans.

¹⁸ Nou pa'n abandonn ou. Ni nou lipye pa'n kit ou semen.

¹⁹ Me ou'n kraz nou dan dezer parmi bann sakal. Ou'n kouver nou anba en gro lonbraz lanmor.

²⁰ Si nou ti'n oubliy non nou Bondye, oubyen lev nou lanmen ver en lot bondye,

²¹ Bondye ki konn sekre leker imen, pa ti ava'n remarke?

²² Akoz ou, nou ganny martirize tou lazournen e ganny trete parey mouton pour labatwar.

²³ SENYER! Leve! Akoz ou dormi? Sorti dan ou sonmey! Pa rezet nou pour touzour!

²⁴ Akoz ou kasyet ou figir? Akoz ou oubliy nou maler ek nou latristes?

²⁵ Nou pe trennen dan lapousyer; nou pe ranpe lo later.

²⁶ Leve! Vin sekour nou! Delivre nou akoz ou fidelite.