Psonm 37 - Labib An Kreol Seselwa

Sor bann Bon ek Move Dimoun

Psonm David.

¹ Pa bezwen pran lakoler kont bann malfeter; pa bezwen zalou bann kriminel.

² Zot pa pou tarde pour sek parey zerb e fletri parey fey ver.

³ Met ou konfyans dan SENYER e fer sa ki byen. Alor, ou ava viv anpe e an sekirite dan sa pei.

⁴ Pran pli gran plezir dan SENYER. I ava donn ou, tou sa ki ou leker i dezir.

⁵ Konfye SENYER ou lavi. Remet tou sa ki ou fer dan lanmen SENYER.

⁶ I ava fer paret ou lazistis parey lalimyer granmaten e ou bann drwa parey soley midi.

⁷ Gard silans devan SENYER, esper li avek pasyans. Pa pran lakoler kont sa bann ki reisi dan lavi, kont sa ki fer bann move kou.

⁸ Pa pran lakoler, reste trankil; gard ou kalm, sankwa tou pou mal fini.

⁹ Annefe, bann malfeter pou ganny eliminen; me bann ki met zot konfyans dan SENYER, pou posed pei.

¹⁰ Dan ankor en pti pe letan, bann malfeter pou disparet. Ou pou rod zot kot zot ti ete, me zot pou nepli la.

¹¹ Me bann pov ki pou posed pei. Zot ava viv dan en lape total.

¹² Bann malfeter i fer konplo kont sa enn ki zis; zot grens son ledan kont li.

¹³ Me sa i fer SENYER riye, akoz i war zour zot zizman vini.

¹⁴ Bann malfeter i tir zot lepe; zot prepar zot dart pour touy sa enn ki pov e ki malere, pour touy sa enn ki mars lo bon semen.

¹⁵ Me zot pou ganny touye avek zot prop lepe e zot dart pou kase.

¹⁶ Sa pti gin ki en zis i posede, i preferab ki larises bokou malfeter.

¹⁷ Annefe, pouvwar bann malfeter pou ganny detri; me SENYER i soutenir sa enn ki zis.

¹⁸ SENYER i konn lavi bann dimoun ki kondwir zot byen. Zot later ava pour zot pour touzour.

¹⁹ Zot pou gard latet byen o dan maler. Dan letan lafanmin, zot pou annan dekwa manze.

²⁰ Me bann malfeter pou ganny detri. Bann lennmi SENYER pou disparet parey bann fler dan lakanpanny. Zot pou ale, zot pou disparet parey lafimen.

²¹ Malfeter i demann pret larzan me zanmen i rann. Sa enn ki obei SENYER i annan pitye e i touzour partaze.

²² Sa bann ki SENYER in beni pou posed pei. Me sa bann ki i'n modi pou ganny eliminen.

²³ SENYER i gid lavi sa enn ki obei li. I protez sa enn ki fer li plezir.

²⁴ Si i perdi lekilib i pa tonbe, akoz SENYER i atrap son lanmen.

²⁵ Mon ti zenn, ozordi mon'n vye. Zanmen mon'n war en dimoun zis ganny abandonnen, ni son bann zanfan pe mandyan manze.

²⁶ Tou le zour i montre zenerozite e i prete; son bann zanfan i en benediksyon.

²⁷ Aret fer sa ki mal, pratik sa ki byen e ou ava reste dan sa pei pour touzour.

²⁸ Annefe, SENYER i kontan lazistis. I pa pou abandonn dimoun ki fidel.

²⁹ Sa enn ki obei SENYER pou posed pei kot i pou reste pour touzour.

³⁰ Dan labous bann zis, i sorti parol lasazes e parol drwat.

³¹ I gard lalwa son Bondye dan son leker; i pa fer okenn fo pa.

³² En malfeter i espyonn sa enn ki zis; i rode ki mannyer pour touy li.

³³ Me SENYER pa pou abandonn li. Dan en prose i pa pou les li ganny kondannen.

³⁴ Met ou konfyans dan SENYER e swiv son semen. I ava fer ou loner posed sa pei e ou ava war malfeter ganny detri.

³⁵ Mon'n war move dimoun vin pwisan e devlope parey en pye sed Liban.

³⁶ Me kan mon ti retournen, i ti nepli la. Mon ti rod li, me i ti'n disparet.

³⁷ Obzerv byen en dimoun onnet; get sa enn ki senp e drwat. Sa enn ki kontan lape pour viv lontan.

³⁸ Me tou bann ki revolte pou ganny detri; zot bann desandan pou disparet.

³⁹ SENYER i sov sa bann ki obei li. I protez zot dan letan maler.

⁴⁰ SENYER i ed zot e i sov zot. I delivre zot kont bann malfeter e i sov zot, akoz zot pran li koman zot labri.