Psonm 19 - Labib An Kreol Seselwa

Laglwar Bondye dan Lakreasyon

Psonm David. Pour sef lakoral.

¹ Lesyel i rakont laglwar Bondye; tou bann zetwal i proklanm travay son lanmen.

² Sak zour i anons li avek en lot zour; lannwit i fer konnen avek lannwit ki swiv.

³ I pa fer okenn diskour, ni dir okenn parol, ni okenn son pour zorey antann.

⁴ Me zot mesaz i ganny tande partou lo later. Zot parol i fer letour lemonn. Bondye in dres en latant pour soley.

⁵ I parey en nouvo marye ki sorti dan son lasanm. Parey en atlet, avek lazwa i lans li dan son lakours.

⁶ I leve lo en bout lorizon e i fini son lakours lo lot kote. Napa nanryen ki sap son lasaler.

⁷ Lalwa SENYER i parfe, i restor lavi. Tou bann regleman SENYER i sir. I donn lasazes sa enn ki senp.

⁸ Bann direktiv SENYER i zis; zot fer leker kontan. Bann komannman SENYER i donn lalimyer; zot fer war kler.

⁹ Respe pour SENYER i pir; i dire pour touzour. Bann desizyon SENYER i vre, e zot touzour zis.

¹⁰ Zot pli presye ki lor, ki en kantite lor pir. Zot pli dou ki dimyel, ankor pli dou ki dimyel ki koule dan gof.

¹¹ Menm mwan, ou serviter, mon ganny averti; i annan gran rekonpans pour sa enn ki met zot an pratik.

¹² Lekel ki kapab konn tou son fot? Pardonn mwan mon bann pese sekre.

¹³ Protez ou serviter kont bann arogan. Pa les zot domin mwan, pour ki mon ava san repros e ganny prezerve kont okenn fot grav.

¹⁴ Mon demann ou aksepte bann parol mon labous e panse mon leker. SENYER! Ou menm mon Ros protekter! Ou menm mon Sover!