Psonm 15 - Labib An Kreol Seselwa

Sa ki Senyer I Demande

Psonm David.

¹ SENYER! Lekel ki kapab ganny resevwar dan ou tanp? Lekel ki kapab vin reste lo ou montanny sen?

² Sa enn ki san repros, ki fer sa ki byen, ki dir laverite e son leker i onnet;

³ ki pa koz dimal lo son prosen, ki pa fer ditor son zanmi, ki pa ensilte son prosen,

⁴ me i rezet bann malfeter, e i onor sa enn ki annan respe pour SENYER. I gard son promes, i annan en sel parol.

⁵ I pret larzan san demann okenn lentere; i pa aksepte gous pour akiz en inosan. Sa enn ki fer tousala, pa pou zanmen tonbe.