Psonm 147 - Labib An Kreol Seselwa

Louanz an Loner Senyer Liniver

¹ Loue SENYER! I bon sant louanz pour nou Bondye! I vreman gou pour loue li akoz i bon.

² SENYER i rekonstri Zerizalenm; i rasanble bann Izraelit ki annegzil.

³ I geri bann ki leker in perdi lespwar. I pans zot bann blesir.

⁴ I desid lo kantite zetwal; i donn sakenn en non.

⁵ Nou SENYER i gran e son pouvwar i gran; son lentelizans napa limit.

⁶ SENYER i rekonfort bann malere; i abes bann malfeter.

⁷ Sant bann kantik rekonesans an loner SENYER! Zwe pour nou Bondye lo laarp!

⁸ I kouver lesyel avek nyaz; i prepar lapli pour later; i fer zerb pouse lo montanny.

⁹ I donn zannimo dekwa manze e nouri bann pti korbo ler zot lafen.

¹⁰ I pa pran plezir dan lafors en seval, ni dan performans en atlet.

¹¹ Me SENYER i pran plezir dan dimoun ki annan respe pour li, dan sa bann ki'n met zot lespwar dan son fidelite.

¹² Zerizalenm! Loue SENYER. Siyon! Loue ou Bondye.

¹³ I ranforsi serir ou bann laport; i beni ou bann zanfan.

¹⁴ I gard lape dan ou bann frontyer; i donn ou meyer rekolt.

¹⁵ SENYER i donn son lord lo later; son parol i ganny vit egzekite.

¹⁶ I fer lannez tonbe parey lalenn; i fer fannen laroze parey lasann.

¹⁷ I fer lagrel tonbe parey gravye; personn pa kapab tenir son lafreser.

¹⁸ Lo son lord, zot fonn; i fer son divan soufle, e delo i koule.

¹⁹ I fer Zakob konn son parol, son bann regleman ek son bann desizyon avek Izrael.

²⁰ Zanmen in azir parey anver okenn lot nasyon. Zot pa konn son bann komannman. Loue SENYER!