Psonm 145 - Labib An Kreol Seselwa

En Kantik Louanz

Psonm David.

¹ Mon pou proklanm ou grander, Bondye mon lerwa. Mon pou loue ou non pour touzour e touzour.

² Mon pou loue ou tou le zour. Mon pou loue ou non pour touzour e touzour.

³ SENYER i gran; i merit ganny tou louanz. Son grander i san limit.

⁴ Zenerasyon apre zenerasyon pou loue ou bann mervey; zot pou rakont ou bann aksyon merveye.

⁵ Mon pou medit lo splander, ou laglwar ek ou mazeste e bann gran mervey ki ou'n fer.

⁶ Ou pwisans formidab pou ganny proklanmen e mon pou rakont ou bann mervey.

⁷ Zot pou selebre ou gran labonte. Zot pou sant byen for ou lazistis.

⁸ SENYER i bon e i pran pitye; i pasyan e son fidelite i gran.

⁹ SENYER i bon anver tou dimoun. I montre son labonte pour tou sa ki i'n kree.

¹⁰ Tou sa ki ou'n fer pou loue ou SENYER. Tou dimoun ki reste fidel pou remersye ou.

¹¹ Zot ava koz lo laglwar ou renny e rakont ou pwisans.

¹² Zot ava fer tou dimoun konn ou bann mervey ek splander laglwar ou rwayonm.

¹³ Ou renny pa pou zanmen fini e ou pouvwar i dire pour touzour. SENYER i tenir tou son promes. I montre son labonte dan tou sa ki i fer.

¹⁴ SENYER i soutenir tou sa ki pe tonbe; i redres tou sa ki kourbe.

¹⁵ Zot tou, zot lev zot lizye ver ou; ou ki donn zot manze kan fodre.

¹⁶ Ou ouver ou lanmen e ou satisfer dezir tou kreatir.

¹⁷ SENYER i zis dan tou sa ki i antreprann; i fidel dan tou sa ki i fer.

¹⁸ SENYER i pre avek tou dimoun ki apel li; tou dimoun ki apel li avek senserite.

¹⁹ I realiz dezir tou dimoun ki annan respe pour li. I osi ekout zot kan zot apel son sekour e i sov zot.

²⁰ SENYER i vey lo tou dimoun ki kontan li; me i pou detri bann malfeter.

²¹ Mon pou loue SENYER avek mon labous e tou kreatir pou loue son non sen pour touzour e touzour.