Psonm 129 - Labib An Kreol Seselwa

Lapriyer Kont bann Lennmi Izrael

Kantik pelrinaz.

¹ Depi mon lazenes, mon lennmi in martiriz mwan. Izrael! Repete!

² Depi mon lazenes, mon'n ganny souvan persekite. Me zot pa ti kapab ganny laviktwar lo mwan.

³ Bann labourer in fer latras lo mon ledo; zot in fouy rigol lo la.

⁴ Me SENYER i zis. I'n koup lakord ki bann malfeter ti'n anmar mwan avek.

⁵ Fer tou sa ki deteste Zerizalenm rekile avek laont.

⁶ Parey zerb lo twa, fer zot sek avan ki i fini pouse.

⁷ I pa ni ranpli lanmen sa enn ki koup li, ni lebra sa enn ki ranmase.

⁸ Bann pasan pa dir zot: SENYER ava beni ou! Nou beni ou, lo non SENYER!