Psonm 128 - Labib An Kreol Seselwa

Rekonpans pour Lobeisans anver Senyer

Kantik pelrinaz.

¹ Byennere sa enn ki annan respe pour SENYER, ki swiv semen ki SENYER i'n trase!

² Ou pou profit rezilta travay ou lanmen; Ou pou ere e ou pou prospere.

³ Dan ou lakaz, ou fanm i parey en pye rezen ki raport bokou rezen. Ou bann zanfan i parey bann brans zoliv otour ou latab.

⁴ Konmsa ki SENYER pou beni sa enn ki annan respe pour SENYER.

⁵ SENYER pou beni ou depi Zerizalenm. Ou pou war Zerizalenm prospere tou le zour ou lavi.

⁶ Ou pou war ou bann pti zanfan. Lape lo Izrael.