Psonm 115 - Labib An Kreol Seselwa

Sel Vre Bondye

¹ Non SENYER! Pa nou. Pa nou ki merite. Me zis ou non ki merit laglwar, akoz ou bonte ek ou fidelite.

² Akoz bann nasyon i demande: Oli zot Bondye?

³ Nou Bondye i dan lesyel; i fer tou sa ki fer li plezir.

⁴ Zot bann zidol i annarzan e annor; in ganny fabrike par lanmen zonm.

⁵ Zot annan labous, me zot pa koze. Zot annan lizye, me zot pa war.

⁶ Zot annan zorey, me zot pa antann. Zot annan nennen, me zot pa santi.

⁷ Zot annan lanmen, me zot pa kapab tate. Zot annan lipye, me zot pa kapab marse. Okenn son pa sorti dan zot lagorz.

⁸ Sa enn ki'n fabrik zot i parey zot ek tou sa bann ki met konfyans dan zot.

⁹ Pep Izrael! Met ou konfyans dan SENYER. I zot lafors e zot soutyen.

¹⁰ Bann pret, desandan Aaron! Met zot konfyans dan SENYER. I zot lafors e zot soutyen.

¹¹ Zot tou ki obei SENYER! Met zot konfyans dan SENYER. I zot lafors e zot soutyen.

¹² SENYER i mazin nou; i pou beni nou. I pou beni pep Izrael; i pou beni desandan pret Aaron.

¹³ I pou beni bann ki obei SENYER, gran koman pti.

¹⁴ SENYER ava fer ou prospere, ou avek ou bann zanfan.

¹⁵ SENYER ki'n fer lesyel ek later ava beni zot.

¹⁶ Lesyel i pour SENYER, me in donn bann imen later.

¹⁷ Dimoun mor pa loue SENYER; ni sa bann ki desann dan lemonn lanmor.

¹⁸ Me nou, nou loue SENYER aprezan e pour touzour. Loue SENYER!