Psonm 107 - Labib An Kreol Seselwa

Louanz pour Labonte Bondye

¹ Remersye SENYER akoz i bon; akoz son fidelite i pour touzour.

² Repete, zot tou, ki SENYER in delivre, zot ki i'n aras dan lanmen lennmi,

³ zot ki i'n rasanble depi bann pei etranze, depi dan Les ziska dan Was, depi dan Nor ziska dan Sid.

⁴ I annan ki ti egare dan dezer, san trouv en semen ki ti ava kondwir zot dan en lavil abite.

⁵ Zot ti lafen, zot ti swaf, zot ti pe perdi lespwar.

⁶ Dan zot detres, zot ti kriy ver SENYER e i ti delivre zot dan zot langwas.

⁷ I ti gid zot lo en semen ki ti anmenn zot direk dan en lavil abite.

⁸ Remersye SENYER pour son fidelite; pour bann mervey ki i'n fer an faver limanite!

⁹ Akoz sa enn ki ti swaf ti ganny delo; sa enn ki ti lafen ti ganny dekwa manze.

¹⁰ Serten dimoun ti pe viv dan fernwanr lanmor; zot ti prizonnyen lanmizer, atase dan lasenn.

¹¹ Zot ti'n rebel kont komannman Bondye e rezet konsey sorti kot Bondye Toupwisan.

¹² Zot ti'n ganny imilye par lasoufrans; personn pa ti vin lev zot ler zot ti'n tonbe.

¹³ Dan zot detres, zot ti kriy ver SENYER e i ti delivre zot dan zot langwas.

¹⁴ I ti fer zot sorti dan zot gro fernwanr lanmor e i ti kas zot lasenn.

¹⁵ Remersye SENYER pour son fidelite; pour bann mervey ki i'n fer an faver limanite,

¹⁶ akoz i'n kas bann laport an bronz; i'n kas bann baro an fer.

¹⁷ En bann fou ti soufer akoz zot dezobeisans e par zot pese.

¹⁸ Tou kalite manze ti degout zot; zot ti deza annan en lipye dan latonm.

¹⁹ Dan zot detres, zot ti kriy ver SENYER e i ti delivre zot dan zot langwas.

²⁰ Par son parol, i ti geri zot e delivre zot dan lafos.

²¹ Remersye SENYER pour son fidelite; pour bann mervey ki i'n fer an faver limanite.

²² Ofer bann sakrifis remersiman e sant avek lazwa, tou son bann mervey.

²³ Bann ki ti al vwayaze lo lanmer dan bato pour zot pratik zot metye lo losean,

²⁴ zot ti war bann mervey ki SENYER i'n fer, bann mirak fantastik ki i ti fer dan losean.

²⁵ Lo son lord, tanpet ti leve e fer monte gro laroul lo lanmer.

²⁶ Zot ti monte ver lesyel e desann dan profonder. Bann maren ti ganny maldemer.

²⁷ Zot ti war tou keksoz tournen; zot ti drive parey en zonm sou; tou zot leksperyans pa ti servi.

²⁸ Alor, dan zot detres, zot ti kriy ver SENYER e i ti delivre zot dan zot langwas.

²⁹ I ti kalme tanpet e bann laroul ti reste trankil.

³⁰ Zot ti kontan kan lanmer ti kalmi e SENYER ti gid zot dan por kot zot ti anvi ale.

³¹ Remersye SENYER pour son fidelite; pour bann mervey ki i'n fer an faver limanite.

³² Proklanm son grander dan lasanble son pep! Loue li dan lasanble bann ansyen!

³³ I fer bann larivyer vin dezer; i fer bann sours aret koule.

³⁴ Akoz mesanste son bann zabitan, en later fertil in vin en laplenn disel.

³⁵ I transform dezer an basen delo, e bann sours an en landrwa dezer.

³⁶ I etabli en lavil pour bann zabitan anfanmen.

³⁷ Zot senm lagrenn, zot plant pye rezen e i donn en bon rekolt.

³⁸ SENYER i beni zot e zot popilasyon i ogmante; i pa les zot troupo diminyen.

³⁹ Zot ganny imilye, abese; zot ganny abize, zot dan traka ek sagrinasyon.

⁴⁰ SENYER i kouver bann ki pe kraz zot avek laont; i fer zot egare dan dezer.

⁴¹ Me i sov bann pov ki dan lanmizer; i fer grandi bann fanmir parey bann troupo.

⁴² I dan lazwa ler i war dimoun ki leker i pir. Labous bann malfeter i fermen.

⁴³ Bann ki saz! Pran kont lo tousala e konpran ki SENYER i fidel.