Psonm 106 - Labib An Kreol Seselwa

Senyer I Bon Anver Son Pep

¹ Loue SENYER, akoz i bon, son fidelite i dire pour touzour.

² Lekel ki kapab rakont tou bann mervey ki i'n fer? Lekel ki kapab fini loue li?

³ I byennere sa enn ki fer sa ki drwat e ki touzour pratik lazistis.

⁴ SENYER! Mazin mwan, pran ka avek ou pep, sekour mwan.

⁵ Konmsa, mon ava war boner ou pep ki ou'n swazir, partisip dan lazwa ou nasyon e partaz lafyerte sa bann ki ou posesyon.

⁶ Parey nou bann zanset, nou'n fer pese. Nou'n fer sa ki mal, nou koupab.

⁷ Kan nou bann zanset ti Lezip, zot pa ti konpran ou bann mervey. Zot ti oubliy tou ou bann byenfe; zot ti revolte kont ou obor lanmer Rouz.

⁸ Me i ti sov zot pour loner son non, pour li montre zot son gran pwisans.

⁹ I ti komann lanmer Rouz e lanmer ti vin sek. I ti fer zot travers dan fon lanmer, konmsi zot ti pe travers dezer.

¹⁰ I ti sov zot dan lanmen bann ki ti oule detri zot. I ti delivre zot dan lanmen zot bann ladverser.

¹¹ Delo ti kouver zot bann ladverser; personn pa ti sape.

¹² Alor, zot ti krwar dan son parol; zot ti sant son louanz.

¹³ Me zot ti vit oubliy sa ki i ti'n fer; zot pa ti esper son konsey.

¹⁴ Dan dezer, zot ti ranpli avek lanvi. Dan later arid, zot ti provok Bondye.

¹⁵ I ti donn zot sa ki zot ti demande. Apre, i ti anvoy lo zot en maladi ki fer deperi.

¹⁶ Dan kan, zot ti zalou Moiz ek Aaron, en zonm konsakre pour SENYER.

¹⁷ Alor, later ti ouver e anval Datann; i ti anter bann konplis Abiranm.

¹⁸ Dife ti bril zot tou; laflanm ti bril tou sa bann malfeter.

¹⁹ Lo montanny Horeb, zot ti fabrik en zenn bef, zot ti ador en morso metal.

²⁰ Zot ti ranplas laglwar Bondye par stati en zenn bef ki manz zerb.

²¹ Zot ti'n oubliy Bondye zot Sover ki ti'n fer bann gran mervey Lezip,

²² bann mervey dan pei Kanm e bann aksyon terib dan lanmer Rouz.

²³ I ti deside alor, pour detri zot. Me Moiz ki i ti'n swazir, ti entervenir devan li pour ki dan son lakoler, i pa detri zot.

²⁴ Zot ti rezet sa pei merveye akoz zot pa ti krwar dan son promes.

²⁵ Zot ti mirmire anba zot latant; zot pa ti ekout lavwa SENYER.

²⁶ Alor, i ti fer serman lanmen leve pour detri zot dan dezer,

²⁷ dispers zot bann desandan e detri zot parmi bann nasyon.

²⁸ Apre, zot ti al atas zot avek Baal e manz bann sakrifis ki ti ganny ofer pour dimoun mor.

²⁹ Sa ti provok lakoler SENYER e en gran fleo ti tonm lo zot.

³⁰ Alor, Fineas ti leve e regle sa zafer e sa fleo ti arete.

³¹ Sa ti ganny konte koman en aksyon zis parmi bann zenerasyon pour touzour.

³² Zot ti fer SENYER ankoler kot sours Meriba e sa, ti koz maler pour Moiz.

³³ Dan son lakoler, Moiz ti koze san reflesir.

³⁴ Zot pa ti detri bann pep parey SENYER ti'n donn zot lord.

³⁵ Me zot ti al melanz avek zot e aprann zot bann pratik.

³⁶ Zot ti ador zot bann zidol ki ti vin en latrap pour zot.

³⁷ Zot ti ofer zot prop garson ek zot bann fiy koman sakrifis avek bann demon.

³⁸ Zot ti fer disan inosan koule; disan zot prop garson, zot prop fiy, ki zot ti ofer an loner bann zidol Kanaan; e pei ti ganny sali avek disan.

³⁹ Par sa bann aksyon, zot ti'n vin enpir e zot ti vin bann prostitye par zot mannyer fer.

⁴⁰ Alor, lakoler SENYER ti monte kont son pep e i ti degout zot.

⁴¹ I ti livre zot dan lanmen bann nasyon etranze e zot bann lennmi ti domin lo zot.

⁴² Lennmi ti kraz zot e soumet zot anba zot pouvwar.

⁴³ I ti delivre zot plizyer fwa; me zot ti kontinyen revolte e anfonse dan zot pese.

⁴⁴ Me ler i ti antann zot kriye e war zot detres,

⁴⁵ i ti rapel son lalyans avek zot. Dan son gran fidelite, i ti pran konpasyon pour zot.

⁴⁶ I ti fer tou sa bann ki ti pe gard zot koman prizonnyen pran pitye pour zot.

⁴⁷ SENYER nou Bondye, sov nou! Rasanble nou parmi bann nasyon, pour nou kapab remersye ou non sen; pour nou pran plezir dan ou louanz.

⁴⁸ Loue SENYER, Bondye Izrael depi touzour e pour touzour! Lepep antye ava dir: Amenn! Loue SENYER!