Psonm 103 - Labib An Kreol Seselwa

Lanmour Bondye

En psonm David

¹ Mon loue SENYER. Mon remersye SENYER. Mon loue son non sen avek tou mon leker.

² Mon loue SENYER! Mon pa pou oubliy okenn son bann benediksyon!

³ I pardonn tou ou bann fot e i geri tou ou bann maladi.

⁴ I repran ou lavi dan lafos; i kouronn ou avek fidelite ek konpasyon.

⁵ I ranpli ou avek son benediksyon menm dan lavyeyes; i fer ou reste zenn parey leg.

⁶ SENYER i azir avek lazistis; i defann drwa bann ki ganny abize.

⁷ I ti fer Moiz konn son bann plan; i ti fer pep Izrael war son bann mervey.

⁸ SENYER i ranpli avek konpasyon e i bon; i pasyan e ranpli avek fidelite.

⁹ I pa touzour akiz nou; i pa gard rankin pour touzour.

¹⁰ I pa tret nou dapre nou pese; i pa pini nou dapre sa ki nou merite.

¹¹ Son fidelite pour sa bann ki obei li, i osi gran ki lesyel i lwen avek later.

¹² Parey Les i lwen avek Was, i met nou pese lwen avek nou.

¹³ Parey en papa i annan konpasyon pour son bann zanfan, SENYER i annan konpasyon pour sa enn ki obei li.

¹⁴ Annefe, i konnen koman nou'n ganny kree; i rapel ki nou zis lapousyer.

¹⁵ Zonm! Son lavi i parey zerb; i parey en fler ki'n fleri dan laplenn:

¹⁶ Koman divan i soufle, i disparet e personn pa rekonnet kot i ti ete.

¹⁷ Me fidelite SENYER pour sa enn ki obei li i dire pour leternite e son lazistis i dire ziska plizyer zenerasyon

¹⁸ anver sa enn ki gard son lalyans e ki pa oubliye obei son bann komannman.

¹⁹ SENYER in etabli son tronn dan lesyel i renny lo later antye.

²⁰ Loue SENYER, zot bann lanz! Zot ki pwisan, fer son lavolonte, e obei tou son parol!

²¹ Loue SENYER, tou bann kreatir, tou son bann serviter ki fer son lavolonte!

²² Loue SENYER, zot tou son bann kreatir, partou kot zot ete dan son rwayonm! Mwan osi, mon dir: Mersi SENYER!