Proverb 9 - Labib An Kreol Seselwa

Lenvitasyon Lasazes

¹ Lasazes in konstri son lakaz; in tay son set kolonn.

² I'n touy son bann zannimo, i'n prepar son diven; i'n osi dres son latab.

³ I'n anvoy son bann servant pour kriye lo bann oter dan lavil:

⁴ Bann inyoran! Pas par isi. Avek bann ensanse, lasazes i dir:

⁵ Vin manz mon dipen; vin bwar diven ki mon'n prepare.

⁶ Aret frekantasyon bann inyoran e zot ava viv. Pran semen disernman.

En Ensolan ek En Saz

⁷ Sa enn ki koriz en ensolan, i ganny meprize; sa enn ki repros en malfeter i ganny ensilte.

⁸ Si ou kritik en ensolan, i pou ay ou; me si ou kritik en saz, i pou vin ou zanmi.

⁹ Konsey en saz, e i ava vin pli saz; ansenny en zis, e son konnesans ava ogmante.

¹⁰ Respe pour SENYER i konmansman lasazes. Rezonnman i konmans avek konnesans sa enn ki sen.

¹¹ Annefe, gras a mwan, ou pou viv pli lontan; bann lannen ava ganny azoute avek ou lavi.

¹² Si ou saz, zis ou ki pou profite; si ou ensolan, zis ou ki pou port konsekans.

Lenvitasyon En Fanm Stipid

¹³ En fanm stipid i koz for; i inyoran e i pa konn nanryen.

¹⁴ I asiz devan padport son lakaz; dan en fotey, oubyen lo bann oter lavil.

¹⁵ I apel bann pasan ki pe vey zot prop zafer:

¹⁶ Bann inyoran! Pas par isi. Avek sa bann ki latet i vid, i dir:

¹⁷ Delo vole i dou; dipen ki ou manz an kasyet i bon.

¹⁸ Me zot bann envite pa konnen ki sa fanm pe al dan lemonn lanmor, e ki zot pe desann dan fon rwayonm lanmor.