Proverb 7 - Labib An Kreol Seselwa

Sediksyon En Fanm Enfidel

¹ Mon garson! Gard mon lansennyman; pa oubliy mon bann komannman.

² Gard mon bann komannman e ou ava viv; gard mon lansennyman koman ou kannet lizye.

³ Atas zot lo ou bann ledwa. Ekri zot lo ou leker.

⁴ Dir lasazes: Ou mon ser. Konsider disernman koman en zanmi entim;

⁵ zot ava protez ou kont en lot fanm e kont sa fanm etranze ki konn anmyele.

⁶ Depi lafnet kot mwan, mon ti get atraver rido.

⁷ Parmi bann zennzan, mon ti war en zennonm san rezonnman.

⁸ I ti pe pase dan lari, dan kwen kot en fanm i reste. I ti al lantman kot lakaz sa fanm.

⁹ Soley ti'n kouse, aswar ti pe fer, lannwit ti pe tonbe e fernwanr ti pe fer.

¹⁰ Alor, en fanm ti apros li avek riz dan san leker, abiye parey en prostitye.

¹¹ I ti ardyese e san pider; i ti touzour dan semen;

¹² parfwa lo semen, parfwa lo plas piblik; i espere dan tou krwaze semen.

¹³ Sa fanm ti may li, anbras li e san pider, ti dir li:

¹⁴ Mon ti annan sakrifis lape pour ofer. Ozordi, mon'n akonpli mon ve.

¹⁵ Alor, mon'n sorti pour rankontre ou. Mon ti anvi war ou e mon'n trouv ou.

¹⁶ Mon'n met dra lo mon lili, bann dra kouler fer avek linenn sorti Lezip.

¹⁷ Mon'n parfim mon lili avek lamir, aloes ek kannel.

¹⁸ Vini! Annou fer lanmour ziska demen bomaten; annou soul nou avek lanmour ansanm.

¹⁹ Mon mari pa dan lakour; i'n ale pour en gran vwayaz.

²⁰ In anmenn en sak larzan avek li, i pa pou retournen avan plennlin.

²¹ Sa fanm in anmyel li e sedwir li. I ti antrenn li avek bann parol flater.

²² Toudswit i ti swiv li, parey en bef ki pe al labatwar, parey en fou ki ganny anmare pour li ganny pini,

²³ ziska ki en fles ti transpers son lefwa. I ti parey en zwazo ki fons dan en lasenn, san konnen ki son lavi ti an danze.

²⁴ Aprezan, mon garson! Ekout mwan. Port atansyon lo sa ki mon pou dir:

²⁵ Pa les ou leker swiv sa fanm; pa les ou perdi dan son bann semen.

²⁶ Annefe, in fer tonbe bokou zonm. I'n touy zot tou, menm bann zonm ki tre for.

²⁷ Son lakaz i lantre ver latonm, semen ki desann ver lemonn lanmor.