Proverb 6 - Labib An Kreol Seselwa

Danze Pran Responsabilite Det Lezot

¹ Mon garson! Si ou'n port ou garan anver ou prosen; si ou'n angaz ou pour en etranze;

² si ou'n ganny pran par ou prop parol e atrape par ou prop promes,

³ alor, mon garson, la sa ki ou ava fer pour sorti anba pouvwar ou vwazen: Ale! Depese pour al pled avek li.

⁴ Pa les sonmey ganny ou; pa les ou popyer fermen;

⁵ Degaz ou dan sa pyez, parey en gazel dan latrap, parey en zwazo dan lanmen saser.

Konsey pour bann Parese

⁶ Parese! Obzerv en fourmi. Gete koman i viv e ou ava vin saz.

⁷ Fourmi napa okenn met, ni sirveyan, ni sef.

⁸ I prepar son manze pandan lete; i anmas dekwa manze pandan rekolt.

⁹ Parese! Ziska kan ou pou reste dormi? Kan eski ou pou reveye dan ou sonmey?

¹⁰ En pti sonmey, en pti pe asoupi, dormi en pti pe lebra krwaze,

¹¹ e lanmizer pour vin sirprann ou parey en voler; lanmizer pou vin koman en bandi.

Dimoun ki Mank Senserite

¹² Sa enn ki koz lalang partou kot i pase, i en vagabon, en malfeter.

¹³ I bat lizye pour tronp dimoun; i tap son lipye; i fer siny avek ledwa.

¹⁴ Son lespri i rod fer sa ki mal, i pe touzour prepar en move kou e provok dispit.

¹⁵ Alor, maler pou tonm lo li en kou an gran, napa remed pour domaz ki i'n sibir.

Sa ki Senyer I Deteste

¹⁶ I annan sis keksoz ki SENYER i deteste, e set ki i pa siporte:

¹⁷ En regar meprizan, en labous mansonz, lanmen ki fer koule disan inosan;

¹⁸ en leker ki prepar bann move kou, lipye ki depese pou fer sa ki mal;

¹⁹ en fo temwen, e enn ki senm diskord dan en fanmir.

Fer Atansyon kont Adilter

²⁰ Mon garson! Gard bann komannman ou papa, pa abandonn lansennyman ou manman.

²¹ Atas zot touzour lo ou leker, anmar zot otour ou likou.

²² Zot ava gid ou lo ou semen, zot ava vey lo ou ler ou ava pe dormi e koz avek ou ler ou ava leve.

²³ Annefe, bann komannman i en lalanp, e lansennyman en lalimyer; bann lavertisman ek bann koreksyon, i en semen lavi.

²⁴ I pou protez ou kont bann move fanm e kont mansonz en fanm etranze.

²⁵ Pa dezir son labote dan ou leker e pa les li sedwir ou par son regar.

²⁶ Ou kapab ganny en prostitye pour en bar dipen; me en fanm marye, i riske kout ou, ou lavi.

²⁷ Lekel ki kapab met dife dan son pos, san bril son lenz?

²⁸ Lekel ki kapab mars lo labrez san bril son lipye?

²⁹ Sa i parey pour sa enn ki dormi avek fanm son prosen; sa enn ki tous li pour pey konsekans.

³⁰ Dimoun pa mepriz en voler ki vol zis pour kalme son lapeti ler i lafen.

³¹ Me si i ganny atrape, i pou bezwen pey set fwa plis; i pou perdi tou sa ki i annan se li.

³² Sa zonm ki komet adilter in perdi larezon; sa enn ki fer sa, i detri son lavi.

³³ Sa zonm pou ganny bate e perdi son loner; son dezoner pa pou ganny efase.

³⁴ Annefe, zalouzi i met en mari dan lakoler vyolan e i san pitye ler i pran son revanz.

³⁵ I pa pou aksepte okenn konpansasyon; i pou refiz tou gous, menm si i enportan.