Proverb 25 - Labib An Kreol Seselwa

Diferan Proverb

¹ La ankor bann proverb Salomon ki ti ganny transmet par bann zofisye Ezekyas, lerwa Zida:

² Nou onor Bondye pour gard keksoz sekre. Nou onor lerwa pour dekouver sa ki sekre.

³ Ou pa kapab sond leker bann lerwa, ni oter lesyel, ni profonder later.

⁴ Tir verdigri lo larzan, e lorfev ava fer li vin en lobze presye.

⁵ Sas malfeter devan lerwa, e son pouvwar ava vin pli solid dan lazistis.

⁶ Pa fer vantar devan lerwa; e pa pran plas en dimoun enportan.

⁷ I pli bon ganny dir: Mont isi, ki ganny abese devan en sef.

⁸ Pa rakont lakour tro vit sa ki ou'n war. Ki ou pou fer apre, ler ou ladverser i prouve ki ou annan tor?

⁹ Defann ou ka kont ou prosen zis avek li, me pa devwal sekre en lot dimoun;

¹⁰ sankwa ler i tande, i pou ensilte ou e ou ava perdi ou repitasyon.

¹¹ En parol byen apropriye i parey en ponm annor lo en dekor annarzan.

¹² En bag annor, en lornman fen annor, i parey konsey en saz pour en zorey ki ekoute.

¹³ En mesaze fidel i rekonfort son met ki anvoy li; i parey lafreser lannez pandan larekolt.

¹⁴ Sa enn ki promet kado ki i pa zanmen donnen, i parey nyaz ek divan ki pa anmenn lapli.

¹⁵ Par lapasyans, en sef i ganny persiade. Avek ladouser, lobstak i ganny tire.

¹⁶ Si ou dekouver dimyel, manz zis sa ki ou bezwen. Si ou pran tro, ou pou bezwen vomi.

¹⁷ Pa met souvan lipye kot ou vwazen, sinon i kapab ganny ase avek ou, e konmans deteste ou.

¹⁸ En zonm ki donn fo temwannyaz kont son prosen, i anmenmtan en gro baton, en lepe ek en fles pwent.

¹⁹ Fer konfyans dan en tret zour maler, i parey en ledan kase ek en lipye foule.

²⁰ Sant bann sanson lazwa avek en dimoun tris, i konmsi ou pe tir ou lenz lo ou dan lafreser, oubyen vers vineg lo en boubou.

²¹ Si ou lennmi i lafen, donn li keksoz pour manze; si i swaf, donn li keksoz pour bwar.

²² Annefe, ou ava met li mal alez, konmsi i annan labrez lo son latet.

²³ Vandnor i anmenn lapli; mansonz, i anmenn lakoler.

²⁴ Vomye reste dan en kwen lakaz, plito ki viv dan lakaz en fanm kankan.

²⁵ En bon nouvel sorti dan en pei lwenten i parey delo fre pour sa enn ki pe mor laswaf.

²⁶ En dimoun zis ki tranble devan en malfeter, i parey en lafontenn oubyen en pwi delo sal.

²⁷ I pa bon manz bokou dimyel, ni rod tro bokou loner.

²⁸ Sa enn ki pa kapab kontrol son lakoler i parey en lavil san defans, san okenn miray.