Proverb 15 - Labib An Kreol Seselwa

¹ En larepons trankil i repous lakoler; me en parol brit i provok lakoler.

² Parol en saz i ogmant konnesans; me labous en fou i repann lafoli.

³ Lizye SENYER i partou; i obzerv dimoun bon koman move.

⁴ En bon parol i parey en pye dibwa ki donn lavi; me en parol kriyel i kas leker.

⁵ En fou i mepriz lenstriksyon son papa; me sa enn ki aksepte bann reprimann i pridan.

⁶ Lakaz sa enn ki zis i ranpli avek larises; me sa enn ki malonnet, i atir maler lo son byen.

⁷ Labous sa enn ki saz i senm konnesans; me leker sa enn ki bet pa vo nanryen.

⁸ SENYER i deteste sakrifis ofer par bann malonnet; me i pran plezir dan lapriyer sa enn ki zis.

⁹ SENYER i deteste mannyer fer en malfeter; me i kontan sa enn ki rod lazistis.

¹⁰ Sa enn ki abandonn en bon semen, pou ganny pini severman; me sa enn ki deteste repros, pou mor.

¹¹ SENYER i konnen sa ki pase dan lemonn lanmor; me i konn plis, sa ki pase dan leker imen.

¹² Sa enn ki ensolan pa kontan ganny kritike; i pa kontan pran konsey sa enn ki saz.

¹³ Lazwa i lo figir sa enn ki annan bonker; me en leker ki dan lapenn i dekouraz lespri.

¹⁴ En saz i rod konnesans. Labous sa enn ki fou i pran plezir dan lafoli.

¹⁵ Pour en pov, lavi i difisil tou le zour; me pour en leker zwaye, lavi i en lafet tou le zour.

¹⁶ Vomye annan en pti gin me annan respe pour SENYER, ki annan larises e viv dan traka.

¹⁷ Vomye en pla legim kot lanmour i rennyen, ki en bef angrese kot i annan laenn.

¹⁸ En zonm malsoufran i provok diskord; me sa enn ki pasyan i kalme dispit.

¹⁹ Semen sa enn ki pares i ranpli avek rons ek pikan; me semen sa enn ki drwat i lib e san problenm.

²⁰ En garson ki saz i fer lazwa son papa; me sa enn ki bet i mepriz son manman.

²¹ Sa enn ki fou i pran plezir dan lafoli; me en zonm rezonnab i mars drwat lo son semen.

²² En proze pa reisi si nou pa demann konsey; me i reisi kan i annan bokou konseye.

²³ En bon larepons i donn lazwa; en larepons apropriye i fer dibyen.

²⁴ En saz i swiv semen ki mont ver lavi; konmsa, i evit lemonn lanmor ki par anba.

²⁵ SENYER i detri lakaz sa enn ki vantar; me i protez propriyete en vev.

²⁶ SENYER i deteste sa enn ki annan move lentansyon; me bann bon parol i fer li plezir.

²⁷ Sa enn ki tay deryer larzan, i anmenn maler dan son fanmir. Me sa enn ki deteste pran gous ava viv lontan.

²⁸ Sa enn ki zis i reflesi avan reponn; labous en malfeter i kras move parol.

²⁹ SENYER i reste lwen avek bann malfeter; me i ekout lapriyer sa enn ki zis.

³⁰ En zoli regar i met lazwa dan leker; en bon nouvel i redonn lafors.

³¹ Sa enn ki ekout konsey ki lavi i donn li, ava annan son plas parmi bann saz.

³² Sa enn ki refiz lenstriksyon, i mepriz son prop lekor; sa enn ki ekout konsey, i aprann koman reflesir.

³³ Respe pour SENYER i ansenny lasazes. Limilite i vin avan loner.