Proverb 1 - Labib An Kreol Seselwa

¹ Bann proverb Salomon, garson David, lerwa Izrael.

Rezon sa Liv

² Sa bann proverb in ganny ekri pour ansenny dimoun lasazes e ganny lenstriksyon. Sa bann Proverb i bon pour konpran bann parol ki fer bokou sans.

³ Zot in ganny ekri pour donn en ledikasyon solid, pour kapab pratik lazistis, respekte lalwa e viv onnetman.

⁴ Sa bann proverb ava rann pridan sa enn ki napa leksperyans, pour donn lazenes konnesans e ed zot pour reflesir.

⁵ Sa enn ki saz ava ekoute pour li ogmant son konnesans; sa enn ki annan disernman ava aprann koman dirize.

⁶ Konmsa, zot ava kapab konpran bann proverb e zot sinifikasyon; ensi ki parol bann saz ek zot bann argiman.

⁷ Respe pour SENYER i konmansman lasazes. Zis bann fou ki napa respe pour lasazes ek lenstriksyon.

Pa Frekant bann Malfeter

⁸ Mon garson! Gard komannman ou papa; pa abandonn lansennyman ki ou manman i ansenny ou.

⁹ Annefe, zot en kouronn lo ou latet e bann kolye otour ou likou.

¹⁰ Mon garson! Pa les bann malfeter anbet ou.

¹¹ Si zot dir ou: Vin avek nou, annou al kasyet pour fer disan koule; annou atak bann inosan dan sekre.

¹² Annou anval zot vivan, parey dan lemonn lanmor, zot lekor antye pou parey sa bann ki al dan pwi.

¹³ Nou pou dekouver en kantite lobze presye. Nou pou ranpli nou lakaz avek piyaz lager.

¹⁴ Ou pou ganny ou par avek nou; nou pou met tou larzan ansanm.

¹⁵ Mon garson! Pa swiv zot semen; evit semen ki zot pran.

¹⁶ Annefe, zot prese pour fer sa ki mal e depese pour fer disan koule.

¹⁷ I initil poz en latrap letan zwazo pe get ou.

¹⁸ Me sa bann zans i poz en latrap pour zot prop maler; zot zet en lasenn kont zot prop lavi.

¹⁹ Konmsa ki lavi tou dimoun ki pran sa ki pa pour li i fini; i pran lavi son met.

Lavertisman Lasazes

²⁰ Lasazes i kriye dan bann semen. I fer tande son lavwa lo bann plas piblik.

²¹ I kriy dan bann krwaze semen kot i annan bokou dimoun. Devan lantre lavil i dir:

²² Zot bann bet! Ziska kan zot pou kontinyen kontan zot sotiz? Ziska kan bann ensolan pou kontan ensilte, e bann sot deteste konnesans?

²³ Ekout mon bann lavertisman! Alor, mon ava devers mon konnesans lo zot; mon ava fer zot konn mon mesaz.

²⁴ Akoz mon ti apel zot, me zot ti refize; akoz mon ti donn zot lanmen, me personn pa ti port atansyon;

²⁵ akoz zot in rezet tou mon bann konsey e refiz mon bann lavertisman,

²⁶ aprezan, mon pou riye ler bann katastrof ava tap zot. Mon pou riy zot, ler lafreyer ava pran zot.

²⁷ Wi! En zour, lafreyer pou pran ou parey en tourbiyon; katastrof pou tonm lo ou parey en louragan; ladetres ek langwas pou anvai ou.

²⁸ Alor, zot ava apel mwan, me mon pa pou reponn; zot pou rod mwan, me zot pa pou trouv mwan.

²⁹ Akoz zot ti deteste konnesans; akoz zot pa'n swazir pour obei SENYER;

³⁰ akoz zot pa'n oule okenn mon bann konsey e mepriz tou mon bann lavertisman,

³¹ zot ava siport konsekans zot mannyer viv e degout zot prop rabasman.

³² Annefe, bann fou pou disparet, akoz zot rezet lasazes. Bann fou i disparet par zot prop lensousyans.

³³ Me sa enn ki ekout mwan, pou viv an sekirite, dan trankilite, san ki maler i fer li per.