Oze 4 - Labib An Kreol Seselwa

Bondye I Akiz Izrael

¹ Izrael, ekoute! Ekout parol SENYER! SENYER i annan en lakizasyon kont bann zabitan sa pei, akoz napa ni lwayote, ni fidelite, ni konnesans Bondye dan sa pei.

² I annan zis malediksyon, mansonz, krim, vol, adilter. Zot pas letan dan vyolans e fer krim enn apre lot.

³ Pour sa rezon pei pou dan dey, son bann zabitan pe deperi ansanm avek bann zannimo sovaz, bann zwazo dan lesyel. Menm bann pwason dan lanmer pe disparet.

Lakizasyon kont bann Pret

⁴ Personn pa devre pe akize, personn pa devre pe fer repros, akoz mon lakizasyon i kont zot, bann pret.

⁵ An plen zour, ou pou tonbe. Bann profet ki kot ou, pou osi tonbe pandan lannwit. Mon pou detri ou manman.

⁶ Mon pep i ganny detri akoz zot mank konnesans. Akoz ou, ou'n rezet konnesans, mon pou rezet ou koman mon pret. Akoz ou'n oubliy lalwa ou Bondye, mon pou oubliy ou bann zanfan.

⁷ Pli zot in ogmante, pli zot pese kont mwan in ogmante. Mon pou fer zot laglwar vin laont.

⁸ Zot anrisi lo pese mon pep. Alor, zot ankouraz mon pep pour komet plis pese.

⁹ Mon pou tret lepep ek bann pret parey. Mon pou fer zot rann kont pour zot konportman. Mon pou fer zot peye pour zot aksyon.

¹⁰ Zot pou manze, me zot pou reste touzour lafen. Zot pou viv dan prostitisyon, me zot popilasyon pa pou ogmante, akoz zot nepli annan respe pour SENYER.

Senyer I Kondann Ladorasyon Zidol

¹¹ Diven ek diven nouvo i fer perdi latet.

¹² Mon pep i kestyonn son morso dibwa; son baton mazik ki donn li larepons. En divan prostitisyon in soufle lo zot e i'n fer zot egare. Zot in tonm dan prostitisyon akoz zot in elwannyen avek zot Bondye.

¹³ Zot ofer sakrifis lo latet bann montanny. Zot bril lansan lo bann kolin, anba nenport pye dibwa ki donn bon lonbraz. Pour sa rezon ki zot bann fiy i dan prostitisyon, e zot bann belfiy i komet adilter.

¹⁴ Mon pa pou fer zot bann fiy rann kont pour zot prostitisyon, ni zot bann belfiy pour zot adilter. Annefe, zot menm, bann pret, zot al kot bann prostitye, zot partaz repa sakre avek bann prostitye dan tanp. En pep san disernman pe al ver son destriksyon.

¹⁵ Izrael, ou'n tonm dan prostitisyon, pourvi ki Zida pa tonm dan menm fot. Pa bezwen al Gilgal, pa mont Bet-Aven, e pa pronons en serman pour dir: Par SENYER ki vivan.

¹⁶ Izrael i retif parey en zenis ki refize bouze. Eski SENYER pou tret li parey mouton dan laplenn?

¹⁷ Efraim in asosye zot avek bann zidol: Les li!

¹⁸ Zot in fini avek zot bwar; zot tonm dan prostitisyon; zot sef i prefer laont.

¹⁹ Zot pou anvole dan divan. Zot pou onte avek zot bann sakrifis.