Oze 13 - Labib An Kreol Seselwa

Zizman lo Izrael

¹ Kan Efraim i koze, Izrael antye i tranble; i ti enportan dan Izrael, me par Baal, i ti rann li koupab e in mor.

² Aprezan i kontinyen fer pese e fer stati an metal, avek zot larzan; avek zot lar, zot ti fabrik bann zidol. Zot ti dir: Ofer sakrifis devan zot! Bann imen ti pe anbras bann zenn toro.

³ Alor, zot pou parey brouyar granmaten, oubyen laroze ki disparet dan en pti moman. Zot parey lapay dible oubyen lafimen ki sorti par lafnet.

⁴ Sepandan, mwan ki SENYER, zot Bondye depi ki zot in sorti Lezip. Zot pa'n konn okenn lot Bondye eksepte mwan; apard mwan, napa en lot sover.

⁵ Mwan ki ti nouri zot dan dezer, dan lasesres.

⁶ Mon ti nouri zot, e zot ti rasazye; zot leker ti fyer e zot ti oubliy mwan.

⁷ Alor, mon pou vin koman en lyon pour zot; koman en leopar, mon pou vey zot lo semen.

⁸ Mon pou atak zot parey en lours ki'n perdi son bann piti; mon pou desir zot lapo leker; parey en femel lyon, mon pou devor zot, parey bann zannimo sovaz.

⁹ Izrael! Mon pou detri ou, lekel ki pou delivre ou?

¹⁰ Oli ou lerwa, pour li sov ou? Dan tou ou bann lavil, oli ou bann sef? Pa ou ti dir: Donn mwan en lerwa ek bann sef?

¹¹ Dan mon lakoler, mon ti donn ou en lerwa, e dan mon lakoler, mon pou repran li.

¹² Bann fot Efraim i ganny anmare byen sere e garde an rezerv dan en landrwa sir.

¹³ Douler pour son nesans i arive, me i sitan bet ki i refize sorti dan vant son manman.

¹⁴ Mon pou liber zot dan lemonn lanmor. Mon pou sov zot dan pouvwar lanmor. Lanmor! Oli ou bann zarm? Lanmor, montre ou pouvwar touye! Mon pou nepli annan pitye pour sa pep.

¹⁵ Menm si i pous byen parey move zerb, divan Les pe vini, SENYER pou anvoy li sorti dan dezer. Tou son sours delo, tou son pwi pou sek. Ou pou ganny depouye avek tou ou bann trezor.

¹⁶ Samari pou pey konsekans son krim, akoz in revolte kont Bondye. Zot pou ganny masakre; pti baba pou ganny kraze; fanm ansent pou ganny ouver vant.