Nonm 32 - Labib An Kreol Seselwa

Trwa Tribi lo Kote Les Larivyer Zourden

¹ Tribi Riben ek Gad ti annan bann gran troupo zannimo. Ler zot ti remarke ki teritwar Yazer ek Galaad ti bon pour elvaz zannimo,

² zot ti vin koz avek Moiz, pret Eleazar ek tou bann sef kominote. Zot ti dir:

³ Atarot, Dibonn, Yazer, Nimra, Hesbonn, Eleale, Sebanm, Nebo, Beonn, rezyon ki SENYER in donn nou,

⁴ i bon pour elvaz zannimo e ou bann serviter i annan bokou zannimo.

⁵ Si ou dakor, donn nou sa rezyon pour nou okipe; i ava vin nou posesyon. Pa fer nou travers larivyer Zourden.

⁶ Moiz ti dir avek sa bann garson Riben ek Gad, “Zot bann frer pou al lager tandis ki zot, zot pou reste isi deryer?

⁷ Akoz zot anvi dekouraz lepep e anpes zot travers larivyer Zourden pour al dan later ki SENYER in promet?

⁸ Zot zanset ti fer parey ler mon ti anvoy zot depi Kades Barnea pour eksplor pei.

⁹ Zot ti al ziska dan vale Eskol pour eksplor pei. Me ler zot ti retournen, zot ti dekouraz pep Izrael pou antre dan sa pei ki SENYER in donn zot.

¹⁰ Lakoler SENYER ti sape sa zour. I ti fer sa promes:

¹¹ Akoz zot pa'n obei mwan, tou sa bann ki'n sorti Lezip, apartir laz 20 an, pa pou antre dan pei ki mon'n promet Abrahanm, Izaak, ek Zakob,

¹² eksepte Kaleb, garson Zefoune, en Kenizit ek Zozye, garson Noun ki'n swiv fidelman parol SENYER.

¹³ SENYER ti ankoler kont pep Izrael e ti fer zot vir vire dan dezer pandan 40 an, ziska ki sa zenerasyon ki pa ti oule obei SENYER ti'n disparet.

¹⁴ Aprezan, zot desandan sa bann zonm peser, zot oule swiv legzanp zot zanset? Zot pare pour fer lakoler SENYER tonm pli for lo pep Izrael?

¹⁵ Si zot refize obei li, i pou kontinyen les Izrael dan dezer e zot pou responsab lanmor tou sa pep.”

¹⁶ Zot ti apros Moiz e zot ti dir, “Nou pou aranz landrwa, konstri park pour nou troupo e konsolid bann lavil pour nou bann fanmir.

¹⁷ Apre sa, nou pou pare pour nou pran zarm pour al lager ansanm avek nou bann frer Izraelit, ziska ki zot ava'n etabli zot. Nou bann dimoun ava pe viv an sekirite dan sa pei.

¹⁸ Nou pou retourn kot nou selman kan tou Izraelit ava'n fini resevwar sakenn son patrimwann.

¹⁹ Nou pa pou pran okenn par dan zot patrimwann ki lo lot kote larivyer Zourden, akoz nou ava'n fini ganny nou par dan kote Les.”

²⁰ Moiz ti dir zot, “Si zot fer parey zot in dir; si zot pran zarm pour al konbat pour SENYER;

²¹ si tou zot bann zonm i travers larivyer Zourden e konbat pour SENYER ziska laviktwar total lo bann lennmi;

²² si zot reste laba ziska ki SENYER in sas tou bann lennmi, alor, zot ava lib devan SENYER ek Izrael pour promes ki zot in fer. Alor, SENYER ava rekonnet ki tou sa teritwar lo kote Les larivyer Zourden i pour zot.

²³ Me si zot pa gard zot promes, mon averti zot ki zot pou komet en pese devan SENYER. Konnen ki i pou pini zot pour sa pese.

²⁴ Al konstri bann lavil pour zot zanfan, fer park pour zot troupo, me pa oubliye pour fer sa ki zot in dir.”

²⁵ Bann Gadit ek bann Ribenit ti dir Moiz, “Ou bann serviter pou fer parey ou'n demande.

²⁶ Nou bann zanfan, nou fanm avek nou bann zannimo pou reste dan bann lavil Galaad.

²⁷ Nou tou, nou pare pour al lager anba komann SENYER parey ou'n dir.”

²⁸ Alor, Moiz ti donn lord lo zot size avek pret Eleazar ek Zozye, garson Noun e avek bann sef bann fanmir dan tribi Izrael.

²⁹ I ti dir zot: Si bann Gadit ek bann Ribenit i travers larivyer Zourden avek zot pour al lager devan SENYER, e pei Kanaan i soumet anba pwisans SENYER, teritwar Galaad ava vin pour zot.

³⁰ Me si zot pa travers larivyer Zourden pour al lager avek zot, zot ava ganny en par propriyete parmi zot dan pei Kanaan.

³¹ Bann Gadit ek bann Ribenit ti reponn, “Nou pou fer sa ki SENYER in dir avek son bann serviter.

³² Anba komann SENYER, nou pou travers larivyer Zourden e al lager, pour ki nou gard nou par patrimwann lo kote Les larivyer Zourden.”

³³ Alor, Moiz ti donn tribi Gad, Riben ek demi tribi Manase, garson Zozef, tou rwayonm lerwa Sihonn, lerwa bann Amorit, ek Og, lerwa Basann, osi bann teritwar ki ti dan zalantour.

³⁴ Tribi Gad ti konstri bann lavil Dibonn, Atarot, Aroer,

³⁵ Atrot-Sofann, Yazer, Yogboa,

³⁶ Bet-Nimra, Bet-Harann, bann lavil fortifye ek lanklo pour bann mouton.

³⁷ Tribi Riben ti rekonstri lavil Hesbonn, Eleale, Kiryataim,

³⁸ Nebo e Baal-Meonn e Sibma. Zot ti donn nouvo non bann lavil ki zot ti konstri.

³⁹ Bann desandan Makir, garson Manase ti pran posesyon pei Galaad. Zot ti sas bann Amorit ki ti pe reste la.

⁴⁰ Alor, Moiz ti donn Makir pei Galaad, garson Manase ki ti etabli li la.

⁴¹ Yair, garson Manase, ti atak e kaptir teritwar dan zalantour. I ti apel zot Lavil Yair.

⁴² Noba ti atak e pran Kenat ek son teritwar dan zalantour. I ti apel sa lavil par son prop non: Noba.