Nonm 30 - Labib An Kreol Seselwa

Lalwa lo bann Ve

¹ Moiz ti koz avek bann sef tribi dan Izrael e donn zot sa bann lord swivan: La sa ki SENYER in ordonnen:

² Kan en zonm i fer en ve anver SENYER, oubyen pran en langazman avek serman anver li menm, i pou bezwen gard son parol; i ava fer parey i'n promet.

³ Kan en zenn fanm ki pe ankor reste kot son paran i fer en ve anver SENYER, e en langazman pour li menm,

⁴ si son papa i konnen ki i'n fer sa ve oubyen sa promes e ki i pa dir li nanryen, tou son ve ava valab, tou langazman ki i'n fer pou osi valab.

⁵ Me si ler i tande, son papa i met lobzeksyon, tou son bann ve e tou son bann langazman ki i'n pran pou tonbe. SENYER ava pardonn li, akoz son papa pa ti dakor avek li.

⁶ Si avan son maryaz i ti'n fer en ve oubyen i ti'n pran en langazman.

⁷ I bezwen gard son ve e tenir son langazman; amwen ki son mari ti'n met lobzeksyon ler i ti tande.

⁸ Me si zour i ti tande, son mari ti met lobzeksyon, ve oubyen langazman ki son fanm ti'n fer pou ganny annile: SENYER pou pardonn li.

⁹ En vev oubyen en fanm divorse ki fer en ve, devret tenir son langazman.

¹⁰ Me si sa fanm ti'n fer son ve oubyen son serman anver li menm letan i ti'n marye,

¹¹ e ki son mari pa ti dir nanryen ler i ti konnen, e i pa'n dezaprouve, alor tou son bann ve e tou son bann langazman anver li menm i reste valab.

¹² Me si, zour i aprann, son mari ti deside anil tou, alor son ve ek son langazman anver li menm pou tonbe. SENYER pou pardonn li, akoz son mari ki'n anil tou.

¹³ En mari i annan tou drwa mentenir oubyen anil nenport ve oubyen langazman ki son fanm in fer.

¹⁴ Me, si zour son mari i tande, i pa met okenn lobzeksyon ziska son lannmen, son fanm i bezwen akonpli tou ve oubyen tou langazman ki i ti'n fer anver li menm. Sa i akoz i pa ti'n dir nanryen zour i ti konnen.

¹⁵ Me si plitar, son mari i deside anil tousala, i pou responsab fot son fanm.

¹⁶ Sa i bann regleman ki SENYER ti donn Moiz konsernan bann rapor ant en mari ek son fanm, oubyen ant en papa ek son fiy anba laz ki ankor pe reste anba son twa.