Nonm 3 - Labib An Kreol Seselwa

Bann Garson Aaron

¹ La bann desandan Aaron ek Moiz kan SENYER ti koz avek Moiz lo montanny Sinai.

² La non bann garson Aaron: Nadab, premye garson, Abihou, Eleazar e Itamar.

³ Sa ti non bann garson Aaron. Zot ti pret e ganny konsakre pour bann fonksyon pret.

⁴ Nadab ek Abihou ti mor devan SENYER, akoz zot ti ofer li en dife ordiner. Zot ti mor dan dezer Sinai e zot ti napa zanfan. Eleazar ek Itamar ti kontinyen ranpli zot fonksyon anba sirveyans zot papa Aaron.

Bann Levit I Ganny Nonmen pour Ed bann Pret

⁵ SENYER ti dir Moiz:

⁶ Fer tribi Levi vini e met zot pare pour asiste Aaron.

⁷ Zot ava travay avek li e zot ava servi pep Izrael antye devan Latant Rankont SENYER, pour ede dan servis sanktyer.

⁸ Zot ava pran swen avek tou bann akseswar ki dan Latant SENYER e zot ava servi pep Izrael dan servis pour sanktyer.

⁹ Alor, ou ava donn Aaron ek son bann garson, bann Levit. Zot ava ganny donnen san rezerv parmi pep Izrael.

¹⁰ Ou ava etabli Aaron ek son bann garson dan zot fonksyon pret. En dimoun ordiner ki apros zot, i devret ganny met anmor.

¹¹ Apre sa, SENYER ti dir Moiz:

¹² Mon pran tou bann levit pour mwan dan plas tou bann lene pep Izrael. Bann levit i pour mwan.

¹³ Annefe, tou bann lene i pour mwan. Depi zour ki mon ti touy tou bann lene dan pei Lezip, mon ti konsakre tou bann lene dan Izrael. Zonm koman zannimo, zot pour mwan. Mwan menm SENYER.

Resansman bann Levit

¹⁴ SENYER ti koz avek Moiz dan dezer Sinai. I ti dir li:

¹⁵ Fer resansman tou bann zanfan tribi Levi par fanmir dapre zot zanset: Fer resansman tou bann garson ki aze en mwan an montan.

¹⁶ Moiz ti fer en resansman dapre lord ki SENYER ti'n donn li.

¹⁷ La non tou bann garson Levi: Gersonn, Keat ek Merari.

¹⁸ La non bann garson Gersonn, klan par klan: Livni ek Simei.

¹⁹ Bann garson Keat, klan par klan: Anmranm, Yisear, Hebron, ek Ouziel.

²⁰ Bann garson Merari: Mali ek Mousi. Sa i bann desandan tribi Levi resanse par fanmir.

²¹ Bann desandan Gersonn: Klan Livnit ek klan Simeit, zot ti desandan bann Gersonit.

²² An tou ti annan 7,500 garson parmi bann Gersonit ki ti aze plis ki en mwan.

²³ Fanmir bann Gersonit ti kanp deryer Latant SENYER dan kote Was.

²⁴ Eliasaf, garson Lael ti sef fanmir bann Gersonit.

²⁵ Travay bann Gersonit dan Latant Rankont SENYER, se pour okip Latant SENYER, son kouvertir, Rido devan lantre Latant Rankont SENYER,

²⁶ Bann zagraf ek rido ki devan lakour ek rido ki otour lakour eksteryer, lotel sakrifis ek tou bann lakord ki ti servi pou mont latant.

²⁷ Bann klan Kehat: Bann Anmramit, bann Yisearit, bann Hebronit, bann Ouzielit; sa ti desandan bann Kehatit.

²⁸ Ler ou kont tou bann Keatit, bann garson ki aze par lao en mwan, i annan en tou 8,600 pou asir servis dan sanktyer.

²⁹ Klan bann Kehatit ti kanp dan kote Sid.

³⁰ Elisafann, garson Ouziel ti sef bann Keatit.

³¹ Zot ti responsab Kof Lalyans, latab, portlanp, bann lotel ek tou bann lobze ki pret ti servi. Zot ti osi ansarz rido ki dan sanktyer e bann zagraf ki servi pour fer montaz avek.

³² Eleazar, garson Aaron ti sef tou bann Levit. I ti ansarz bann pret ki responsab servis dan sanktyer.

³³ Klan Merari: Bann Malit e bann Mousit; ansanm zot ti fer klan Merari.

³⁴ Bann garson Merari ki annan en mwan an montan, i fer an tou 6,200.

³⁵ Souriel, garson Abihail ti sef fanmir bann Merari. Zot ti kanp dan kote Nor avek Latant SENYER.

³⁶ Zot ti ansarz tou bann pike ek bann bar Latant SENYER, bann pike traver, bann kolonn ek son bann lipye, tou son bann montaz ki al avek;

³⁷ bann kolonn deor dan lakour avek zot bann montaz, zot bann pike ek zot bann lakord.

³⁸ Moiz, Aaron ek son bann garson ti kanp devan Latant SENYER, ki lo kote Les. Se zot ki pou fer servis dan sanktyer an faver pep Izrael. Sa enn ki apros sa landrwa, si i pa pret, devret ganny met anmor.

³⁹ Tou bann garson tribi Levi ki Moiz ek Aaron ti konte, aze depi en mwan an montan, ti fer 22,000 an tou.

Bann Levit I Ranplas bann Lene Garson

⁴⁰ SENYER ti dir Moiz: Fer resansman tou bann lene garson bann Izraelit ki annan en mwan an montan. Kont zot enn par enn par zot non.

⁴¹ Gard bann levit pour mwan, mwan menm SENYER, dan plas tou sa bann lene garson pep Izrael. Anmenmtan, ou ava gard tou zannimo bann levit pour mwan dan plas bann lene zannimo dan troupo pep Izrael.

⁴² Alor, Moiz ti fer resansman tou bann lene garson parmi bann tribi pep Izrael parey SENYER ti'n dir li.

⁴³ Bann lene garson ki ti aze plis ki en mwan ti annan an tou 22,273.

⁴⁴ SENYER ti dir Moiz:

⁴⁵ Pran bann levit dan plas bann lene parmi pep Izrael. Pran osi zot zannimo dan plas lene zannimo bann Izraelit. Bann levit i pour mwan, mwan menm SENYER.

⁴⁶ Pour pri sa 273 lene garson dan tribi Izrael ki an plis lo bann levit,

⁴⁷ kont senk pyes larzan par tet e servi lanmonnen sanktyer, 10 granm sakenn.

⁴⁸ Donn tou sa larzan Aaron. Son bann garson pour pri ki ou'n aste bann lene garson ki ti an plis.

⁴⁹ Moiz ti ranmas sa larzan sorti kot sa bann lene garson ki ti'n ganny konte an plis.

⁵⁰ I ti pran sa larzan sorti kot sa bann lene garson: 1,365 pyes larzan dan lanmonnen sanktyer.

⁵¹ Moiz ti donn sa larzan Aaron ek son bann garson, parey SENYER ti'n ordonn li.