Nonm 21 - Labib An Kreol Seselwa

Laviktwar lo bann Kananeen

¹ Kan Arad, lerwa bann Kananeen ki ti gouvern dan Sid Negev, ti tande ki pep Izrael ti pe vin dan direksyon Atarim, i ti atak zot e fer detrwa zot prizonnyen.

² Alor, pep Izrael ti fer en ve avek SENYER: Si ou dakor pour livre sa pep dan nou lanmen, mon pou detri sa bann dimoun ek zot lavil.

³ SENYER ti antann zot e i ti livre bann Kananeen dan lanmen bann Izraelit ki ti detri zot konpletman avek zot bann lavil. Zot ti apel sa landrwa Horma, savedir Destriksyon.

Serpan an Bronz

⁴ Pep Izrael ti kit montanny Hor e pran semen dan direksyon lanmer Rouz. Zot ti kontourn pei Edonm. Me dan semen, lepep ti perdi pasyans.

⁵ Zot ti koz kont Bondye e kont Moiz: Akoz ou'n fer nou sorti Lezip pour nou vin mor dan dezer? Isi napa ni delo ni manze; nou'n degout sa kalite manze mizer.

⁶ Alor, SENYER ti anvoy bann serpan anpwazonnen mord zot. Bokou bann Izraelit ti ganny morde e bokou zot ti mor.

⁷ Lepep ti vin kot Moiz. Zot ti dir li, “Nou'n fer pese kan nou ti koz kont SENYER e kont ou. Priy SENYER pour fer ale sa bann serpan.” Alor Moiz ti priy pour lepep.

⁸ SENYER ti dir Moiz: Fer en serpan an bronz; plas li lo en poto. Tou sa bann ki ti'n ganny morde par serpan anpwazonnen, e ki get sa serpan pa pou mor.

⁹ Alor, Moiz ti fer en serpan an bronz ki i ti met lo en poto. Dimoun ki ti'n ganny morde e ki ti get sa serpan an metal ti reste vivan.

Kit Montanny Hor pour Vale Moab

¹⁰ Pep Izrael ti deplase pour al kanp Obot.

¹¹ Apre sa, zot ti kit Obot e al Iye-Abarim, dan dezer ki anfas avek Moab lo kote Les.

¹² Apre, zot ti al kanp obor larivyer Zered.

¹³ Kan zot ti sorti la, zot ti al kanp lot kote larivyer Arnon, dan teritwar dezer ant Moab ek bann teritwar bann Amorit.

¹⁴ Pour sa rezon, ki i'n ekri dan liv Bann Lager SENYER: Vaheb dan teritwar Soufa e bann vale larivyer Arnon,

¹⁵ lapant vale ki desann ziska Ar, tou dilon frontyer Moab.

¹⁶ Zot ti sorti la e al kanp Beer, savedir pwi, kot SENYER ti dir Moiz: Rasanble lepep e mon ava donn zot delo.

¹⁷ La, pep Izrael ti sant sa kantik: Monte, pwi! Annou sante ler delo i monte.

¹⁸ Pwi ki bann sef in fouye, ki bann nob parmi lepep ti fouye avek baton rwayal! Zot ti kit dezer pour al Matana,

¹⁹ sorti Matana, zot ti al Naaliel; sorti Naaliel zot ti al Bamot.

²⁰ Sorti Bamot, zot ti al dan vale ki dan teritwar Moab, anba montanny Pisga ki anfas avek dezer.

Laviktwar lo Lerwa Sihonn ek Lerwa Og

²¹ Bann Izraelit ti anvoy bann mesaze kot Sihonn, lerwa bann Amorit, pour dir li:

²² Les nou travers ou pei; nou pa pou antre dan okenn plantasyon ni dan ou karo rezen. Nou pa pou bwar delo dan okenn ou bann pwi. Nou pou reste lo gran semen rwayal ziska nou fini travers ou teritwar.

²³ Me Sihonn pa ti les Izrael travers son teritwar. I ti rasanble en gran larme pour al atak bann Izraelit dan dezer.

²⁴ Pep Izrael ti masakre li e pran posesyon son teritwar, depi Arnon ziska Yabok, lo frontyer bann Amorit ki ti byen fortifye.

²⁵ Bann Izraelit ti pran tou bann lavil Amorit kot zot ti enstal zot. Zot ti osi enstal zot dan Hesbonn ek tou son bann vilaz.

²⁶ Hesbonn ti kapital Sihonn, lerwa bann Amorit ki ti fer lager kont lerwa Moab e pran tou son teritwar ziska larivyer Arnon.

²⁷ Pour sa rezon ki bann poet ti sante: Vin Hesbonn! Vin rekonstri lavil! Retabli lavil lerwa Sihonn.

²⁸ Dife ti sorti dan lavil Hesbonn, en laflanm dan lavil Sihonn. I'n detri Ar dan Moab ek bann sef lo oter Arnon.

²⁹ Maler lo ou, Moab! Pei Kemos in ganny detri. I ti les son bann zonm ganny egzile; son bann fiy in ganny kaptire par Sihonn, lerwa bann Amorit.

³⁰ Nou'n masakre zot depi Hesbonn ziska Dibonn; nou'n devaste tou ziska Nofa, ki tous avek Medba.

³¹ Konmsa ki Izrael ti etabli zot dan teritwar bann Amorit.

³² Moiz ti anvoy bann espyon dan Yazer. Izrael ti pran tou bann vilaz dan zalantour. Moiz ti sas bann Amorit ki ti pe reste la.

³³ Apre, zot ti mont dan direksyon Basann. Og, lerwa Basann ti sorti pour al lager avek tou son larme; i ti atak zot Edrei.

³⁴ SENYER ti dir Moiz: Pa bezwen per li. Mon'n livre li, son pep ek son pei dan ou lanmen. Ou ava tret li parey ou'n tret Sihonn, lerwa bann Amorit ki ti gouvern Hesbonn.

³⁵ Bann Izraelit ti touy Og, son bann garson, ek tou son pep. Pa ti reste okenn sirvivan e zot ti pran posesyon son pei.