Nonm 20 - Labib An Kreol Seselwa

Bann Levennman Kades

¹ Pep Izrael, kominote antye, ti ariv dan dezer Sin dan premye mwan e zot ti reste Kades, kot Mirianm ti mor e kot i ti ganny antere.

² Ti napa delo pour lepep e zot ti konplent avek Moiz ek Aaron.

³ Lepep ti revolte kont Moiz. Zot ti dir, “Plito nou osi nou ti'n mor avek nou bann fanmir devan SENYER.

⁴ Akoz ou'n anmenn lasanble SENYER dan sa dezer zis pour nou vin mor isi avek nou bann betay?

⁵ Akoz ou'n fer nou sorti Lezip pour anmenn nou dan sa landrwa dezer? Isi napa ni dible, ni fig, ni rezen, ni grenad; napa ni menm delo pour bwar!”

⁶ Moiz ek Aaron ti sorti e al devan lantre Latant Rankont SENYER. Zot ti prosternen lafas ater e laglwar prezans SENYER ti aparet avek zot.

⁷ SENYER ti dir Moiz:

⁸ Pran ou baton avek ou e ansanm avek ou frer Aaron, rasanble tou dimoun. Koz avek sa ros devan zot, e delo ava sorti dan sa ros. Konmsa ki ou ava fer sorti delo dan sa ros. Zot ava bwar e zot zannimo osi.

⁹ Alor, Moiz ti pran son baton ki ti devan SENYER, parey SENYER ti'n ordonn li.

¹⁰ Moiz ek Aaron ti rasanble tou kominote Izrael devan ros. Moiz ti dir zot, “Ekout mwan byen, pep rebel! Eski nou kapab fer sorti delo dan sa ros pour zot?”

¹¹ Apre, i ti lev son lanmen e tap sa ros de fwa avek son baton. Delo ti sorti, tou dimoun ti bwar e zot betay osi.

¹² Alor, SENYER ti dir Moiz ek Aaron: Akoz zot pa'n krwar dan mwan pour montre mon sentete devan pep Izrael, pa zot ki pou fer antre sa pep dan sa pei ki mon'n promet zot.

¹³ Sa ti delo Meriba, savedir kerel, kot pep Izrael ti konplent kont SENYER e kot SENYER ti montre zot ki i en Bondye sen.

Lerwa Edonm I Refize Les Pep Izrael Pase

¹⁴ Depi Kades, Moiz ti anvoy bann mesaze kot lerwa Edonm pour dir li: La sa ki ou bann frer Izrael i dir: Ou'n antann tou mizer ek difikilte ki nou'n pas ladan.

¹⁵ Nou zanset ti desann Lezip kot zot in reste pandan lontan. Bann Ezipsyen pa ti tret nou ek nou bann zanset byen.

¹⁶ Nou ti kriye e SENYER in antann nou. I ti anvoy son mesaze pou vin delivre nou Lezip. La aprezan, nou'n ariv Kades, en lavil ki baliz avek ou teritwar.

¹⁷ Les nou travers ou pei. Nou pa pou antre dan ou plantasyon, ni dan ou karo rezen, oubyen bwar delo dan ou pwi. Nou pou reste lo semen ziska ki nou fini travers ou teritwar.

¹⁸ Me Edonm ti reponn: Ou pa pou pas kot mwan, sankwa mon pou atak ou avek lepe.

¹⁹ Pep Izrael ti dir li: Nou pou reste lo semen e si nou ek nou zannimo i bwar ou delo, nou ava pey ou; nou zis anvi traverse, pa plis.

²⁰ Me Edonm ti dir: Non! Zot pa pou pase. Bann Edomit ti sorti kont zot avek en gran larme.

²¹ Konmsa, Edonm ti refize les Izrael pas lo son teritwar. Bann Izraelit ti bezwen pran en lot semen.

Lanmor Aaron

²² Kominote Izrael ti kit Kades e ariv dan montanny Hor.

²³ Ler zot ti ariv lo frontyer Edonm, SENYER ti dir Moiz ek Aaron:

²⁴ Aaron pe al mor; i pa pou antre dan pei ki mon'n promet zot. Tou le de, zot ti revolte kont mwan konsernan delo Meriba.

²⁵ Pran Aaron ek son garson Eleazar; mont lo montanny Hor.

²⁶ La, ou ava tir rob pret ki lo Aaron e ou ava met li lo son garson, Eleazar. Aaron pou mor la lo montanny.

²⁷ Moiz ti fer sa ki SENYER ti ordonn li. Zot ti mont lo montanny Hor devan kominote Izrael antye.

²⁸ Moiz ti tir rob pret lo Aaron e abiy son garson, Eleazar. Aaron ti mor lao lo sa montanny. Apre, Moiz ek Eleazar ti desann sorti lo montanny.

²⁹ Kan kominote Izrael ti war ki Aaron ti'n mor, pep antye ti met dey pandan 30 zour.