Nonm 17 - Labib An Kreol Seselwa

Baton Aaron I Fleri

¹ SENYER ti dir Moiz:

² Dir avek pep Izrael, anmenn sakenn en baton pour sak tribi, avek non zot tribi lo la, dapre zot sef par tribi.

³ I devre annan en baton pour sak sef avek son non lo la. Lo baton tribi Levi ou ava ekri non Aaron.

⁴ Pran sa bann baton e depoz zot dan Latant Rankont SENYER devan Temwannyaz kot mon rankontre ou.

⁵ Sa zonm ki mon pou swazir, son baton pou fleri. Konmsa, mon ava fer ansort ki pep Izrael ava aret konplent kont ou.

⁶ Moiz ti dir tousala avek pep Izrael: Sak tribi ti prezant en baton avek non son sef lo la. Ti annan 12 baton an tou. Baton Aaron ti dan milye lezot baton.

⁷ Moiz ti depoz sa bann baton devan SENYER dan Latant Temwannyaz.

⁸ Lannmen, kan Moiz ti antre dan Latant, baton Aaron pour tribi Levi ti'n bourzonnen; bouton ti'n sorti e ti'n fleri. I ti annan fri lamann mir lo la.

⁹ Moiz ti tir sa bann baton devan SENYER e montre pep antye. Zot ti gete e sakenn ti repran son baton.

¹⁰ SENYER ti dir Moiz: Pran baton Aaron e remet li devan Kof Lalyans. I ava en lavertisman pour bann rebel, pour ki zot aret fer konplent kont mwan, sankwa zot pou mor.

¹¹ Moiz ti fer parey SENYER ti'n dir li.

¹² Pep Izrael ti dir avek Moiz: In fini pour nou. Nou pe disparet. Nou tou, nou pe ganny detri!

¹³ Tou dimoun ki apros Latant SENYER pou mor. Eski nou tou nou pou mor?