Nonm 12 - Labib An Kreol Seselwa

Pinisyon Mirianm

¹ Mirianm ek Aaron ti kritik Moiz akoz son fanm Kousit. Annefe, Moiz ti'n marye avek en fanm sorti Letyopi.

² Zot ti dir: Eski SENYER i koz zis par lentermedyer Moiz? Pa i koz osi atraver nou? SENYER ti antann zot.

³ Moiz ti en zonm avek bokou limilite, plis ki nenport ki zonm lo later.

⁴ En sel kou, SENYER ti dir Moiz, Aaron ek Mirianm: Zot tou le trwa, al kot Latant Rankont SENYER. Tou le trwa ti ale.

⁵ SENYER ti desann dan kolonn nyaz e i ti aparet devan lantre Latant. I ti apel Aaron ek Mirianm; tou le de ti avans devan.

⁶ I ti dir zot: Ekout byen mon parol! Ler i annan en profet parmi zot, mwan SENYER, mon revel mwan avek li dan en vizyon; mon koz avek li dan en rev.

⁷ I pa le ka avek mon serviter Moiz. Li menm sa zonm konfyans ki ansarz mon pep Izrael.

⁸ Mon koz avek li fas a fas san servi okenn parabol e i menm war mon laform! Koman eski zot oze koz kont mon serviter Moiz san okenn lafreyer.

⁹ SENYER ti pran en gran lakoler kont zot e i ti ale.

¹⁰ Kan nyaz ti leve par lao Latant, Mirianm ti kouver avek lalep. I ti'n vin blan koman lannez. Aaron ti tournen pour get Mirianm, i ti war li kouver avek en maladi parey lalep.

¹¹ Alor, i ti dir Moiz, “Mon senyer! Pardon, pa les nou soufer pour en pese ki nou'n fer dan en moman lafoli.

¹² Pa les li vin parey en pti baba mor an nesan ki lapo i deplise ler i ne.”

¹³ Alor Moiz ti priy SENYER. I ti dir, “Mon Bondye, mon sipliy ou, geri li!”

¹⁴ SENYER ti reponn, “Si son papa ti'n kras dan son figir, pa i ti pou dan laont pandan set zour? Alor, met li deor pour set zour e apre sa, i ava kapab repran son plas dan kan.”

¹⁵ Mirianm ti ganny met an deor kan pandan set zour. Lepep pa ti deplase ziska ki i ti ganny readmet dan kan.

¹⁶ Apre sa, zot ti kit Haserot e al kanp dan dezer Parann.