Nehemi 8 - Labib An Kreol Seselwa

Esdras I Lir Lalwa devan Pep Izrael

¹ Pep antye ti rasanble ansanm dan laplas piblik devan laport Delo. Zot ti demann skrib Esdras pour anmenn liv lalwa Moiz, ki SENYER ti'n donn Izrael.

² Alor, premye zour, setyenm mwan, pret Esdras ti anmenn liv lalwa devan lasanble antye; tou dimoun: Zonm, fanm, avek tou sa bann ki ti kapab tande e konpran.

³ Depi bomaten ziska midi, i ti lir dan liv, devan laplas ki anfas avek laport Delo, dan prezans tou dimoun: Zonm, fanm ek tou bann ki ti kapab konpran; tou dimoun ti ekout atantivman lektir liv lalwa.

⁴ Skrib Esdras ti debout lo en lestrad an bwa ki ti'n ganny fer pour sa lokazyon. Lo son kote drwat, ti annan Matitia, Sema, Anaya, Ouri, Hilkiya ek Maaseya; lo son kote gos, ti annan Pedaya, Misael, Malkiya, Hasoum, Hasbadana, Zakari ek Mesoulanm.

⁵ Esdras ti ouver liv devan tou lepep, akoz i ti pe debout anler pli o ki lezot; ler i ti ouver liv, tou lepep ti leve, debout.

⁶ Esdras ti rann glwar SENYER, sa gran Bondye. Lepep antye ti lev lanmen e reponn: Amenn! Amenn! Zot ti bes zot latet e prostern devan SENYER, lafas ater.

⁷ Lepep ti reste debout pandan ki bann levit Zozye, Bani, Serebya, Yamin, Akoub, Sabetai, Hodiya, Maaseya, Kelita, Azarya, Yozabad, Hanann, ek Pelaya ti eksplik zot lalwa.

⁸ Zot ti lir klerman dan liv lalwa Bondye e zot ti eksplike pour ki lepep i konpran sa ki bann levit ti pe lir.

⁹ Gouverner Nehemi, pret e skrib Esdras, ek bann levit ki ti pe ansennyen, ti dir lepep antye, “Sa zour i sakre pour SENYER, zot Bondye. Pa bezwen port dey ni plere.” Annefe, lepep antye ti pe plere ler zot ti pe ekout parol lalwa.

¹⁰ Apre, Esdras ti dir zot, “Ale! Manz bann bon pla gra e bwar bann liker dou; anvoy en pe pour bann ki pa'n prepar nanryen, akoz sa zour i sakre pour nou SENYER. Pa bezwen pran lapenn, akoz lazwa SENYER i zot lafors!”

¹¹ Bann levit ti kalme lepep. Zot ti dir, “Gard silans, akoz sa zour i sakre. Pa bezwen pran lapenn!”

¹² Tou dimoun ti al sakenn dan son kote pour manze, bwar, e partaze, pour montre zot gran lazwa, akoz zot ti'n konpran bann parol ki ti'n ganny lir avek zot.

Lafet bann Payot

¹³ Dezyenm zour, bann sef lafanmir lepep antye, bann pret ek bann levit ti rasanble kot skrib Esdras, pour etidye parol lalwa.

¹⁴ Zot ti war ekri dan liv lalwa, ki SENYER ti'n donnen par lentermedyer Moiz, ki pep Izrael ti devre reste dan bann payot pandan lafet, dan setyenm mwan,

¹⁵ e ki zot ti devre pibliye e proklanm sa lalwa, dan tou zot bann lavil e dan Zerizalenm: Al lo bann montanny e anmenn bann brans pye zoliv, brans bann pye zoliv sovaz, mirt, brans palmye, ek lezot feyaz pour fer bann payot, parey in ganny ekri.

¹⁶ Alor, lepep ti sorti e anmenn sa bann brans. Sakenn ti fer son payot lo son twa, dan son lakour, dan lakour tanp Bondye, lo laplas Laport Delo e lo laplas Laport Efraim.

¹⁷ Lasanble antye ki ti'n retournen sorti annegzil, ti fer sa bann payot; zot ti reste ladan. Annefe, depi lepok Zozye, garson Noun, ziska ozordi, bann Izraelit pa ti'n zanmen fer sa. Alor ti annan gran selebrasyon.

¹⁸ Sak zour, depi premye zour ziska dernyen zour, zot ti lir liv lalwa Bondye. Zot ti selebre lafet pandan set zour. Dapre regleman, son wityenm zour, ti en zour lasanble solannel.