Mise 1 - Labib An Kreol Seselwa

¹ SENYER ti koz avek Mise ki sorti Moreset, dan lepok Yotanm, Akaz ek Ezekyas bann lerwa dan rwayonm Zida. SENYER ti revel par bann vizyon sa ki ti konsern Samari ek Zerizalenm.

Zizman kont Samari

² Ekoute! Zot tou bann nasyon! Later ek tou son zabitan! Ekoute. Senyer BONDYE pou akiz zot depi son tanp sen.

³ SENYER pe sorti dan son demer. I desann e mars lo bann montanny.

⁴ Bann montanny pou fonn anba son lepa, e bann vale pou ouver. Zot pou fonn parey lasir devan dife, parey delo ki koule lo en lapant.

⁵ Tousala i arive akoz pese Zakob, e akoz pese pep Izrael. Ki fot desandan Zakob in fer? Pa Samari? Lekel ki koupab pour lenfidelite dan Zida? Pa Zerizalenm?

⁶ Alor, mon pou fer laplenn Samari vin en ta debri, kot i bon zis pour plant rezen. Mon pou fer deboule son bann ros dan vale. Tou son fondasyon pou paret.

⁷ Tou son bann stati pou ganny kas an morso. Kado ki zot in resevwar pou ganny zete dan dife. Mon pou detri tou son bann zidol. Zot bann gen prostitisyon pou reganny servi dan prostitisyon.

Lamantasyon lo bann Lavil Zida

⁸ Pour sa rezon, mon pou lamante e kriye. Mon pou mars pyeni e touni. Mon pou irle parey en sakal e plennyen parey en lotris.

⁹ Annefe, son boubou i san okenn gerizon. I'n fannen ziska Zida; i'n ariv kot laport mon pep, ziska Zerizalenm.

Lennmi I Apros Zerizalenm

¹⁰ Pa anons sa dan Gat, pa plere. Dan Bet-Leafra, roul zot lekor dan lapousyer.

¹¹ Zabitan Safir! Ale. Pran semen legzil touni e dan laont! Zabitan Saanann pa oze sorti. Dan Bet-Esel i annan lamantasyon; i nepli donn son sipor.

¹² Zabitan Marot pe enkyet pour son boner. Me maler sorti kot SENYER, in ariv ziska devan laport Zerizalenm.

¹³ Zabitan Lakis! Atas seval avek kales. Se kot ou, ki pese ki'n fer zabitan Zerizalenm tonbe, ti konmanse. Ou ki responsab pour tou sa bann pese Izrael.

¹⁴ Pour sa rezon, ou devre separe avek Moreset-Gat. Zabitan Akzib pou vin en desepsyon pour bann lerwa Izrael.

¹⁵ Zabitan Maresa! SENYER pou anvoy en lot lennmi kont zot. Bann gran sef Izrael, pou al kasyet Adoulanm.

¹⁶ Zabitan Zerizalenm! Raz ou latet, koup ou seve, akoz ou bann zanfan byenneme. Fer ou latet sov parey en leg, akoz zot pe ganny anmennen annegzil lwen avek ou.