Matye 5 - Labib An Kreol Seselwa

Sermon lo Montanny

¹ Kan Zezi ti war lafoul ki ti vin kot li, i ti mont lo en montanny. I ti asiz e son bann disip ti vin otour li.

² I ti konmans donn zot sa lansennyman:

Vre Boner

³ Byennere bann ki konnen zot pov, akoz Rwayonm lesyel i pour zot!

⁴ Byennere bann ki dan latristes, akoz zot pou ganny konsole!

⁵ Byennere bann ki dou, akoz zot pou posed later!

⁶ Byennere bann ki lafen e swaf lazistis, akoz zot pou rasazye!

⁷ Byennere bann ki annan konpasyon pour lezot, akoz Bondye pou annan konpasyon pour zot!

⁸ Byennere bann ki annan leker pir, akoz zot pou war Bondye!

⁹ Byennere bann ki fer lape, akoz zot pou ganny apele bann zanfan Bondye!

¹⁰ Byennere bann ki ganny persekite pour lazistis, akoz Rwayonm lesyel i pour zot!

¹¹ Zot byennere, kan zot ganny ensilte, persekite akoz mwan; kan dimoun i koz dimal kont zot, akoz mwan!

¹² Rezoui e santi zot ere, akoz annan en gran rekonpans pe esper zot dan lesyel! Konmsa menm ki zot bann zanset ti persekit bann profet avan zot.

Disel Later ek Lalimyer Lemonn

¹³ Zezi ti kontinyen dir: Se zot disel later. Me si disel i perdi son gou, avek kwa ou pou redonn li son gou sale? I pa bon pour nanryen; i ganny zete deor, pour dimoun mars lo la.

¹⁴ Se zot lalimyer lemonn. En lavil ki'n ganny konstri lo en montanny pa kapab ganny kasyet.

¹⁵ Personn pa alim en lalanp pour met anba en bol, me i met li anler lo en portlanp pour ekler tou dimoun ki dan lakaz.

¹⁶ Konmsa ki zot lalimyer i devre klere devan tou dimoun, pour ki zot war byen zot bann bon aksyon e loue zot Papa ki dan lesyel.

Lansennyman lo Lalwa

¹⁷ Pa krwar ki mon'n vin pour fer disparet Lalwa Moiz ek lansennyman bann profet. Mon pa'n vin pour detri, me pour akonplir.

¹⁸ Mon dir zot, sa i laverite: Osi lontan ki lesyel ek later i egziste, pa menm en pli pti let, ni en pli pti detay Lalwa pou ganny detri, ziska ki tou sa bann lansennyman i ganny akonpli.

¹⁹ Alor, sa enn ki kas en pli pti komannman e ansenny lezot pour fer parey, i pou ganny deklare pli pti dan Rwayonm lesyel. Me sa enn ki met mon bann komannman an pratik e ansenny lezot pour fer parey, i pou ganny deklare gran dan Rwayonm lesyel.

²⁰ Mon asir zot: Si zot fidelite anver lavolonte Bondye pa depas fidelite bann profeser Lalwa ek bann Farizyen, zot pa pou kapab antre dan Rwayonm lesyel.

Lansennyman lo Lakoler

²¹ Zot in tande ki nou zanset ti ganny demande: Pa fer krim; sa enn ki fer krim pou ganny zize.

²² Me mwan mon dir zot: Sa enn ki pran lakoler kont son frer, pou ganny zize. Sa enn ki ensilte son frer, pou ganny zize devan tribinal. Sa enn ki tret son frer: Fou, pou ganny pini dan dife lanfer.

²³ Si alor, ou pe al prezant ou lofrann devan lotel, e ki ou rapel ki ou frer i annan keksoz kont ou,

²⁴ kit ou lofrann la, devan lotel, e al fer lape avek ou frer avan. Apre, retournen e prezant ou lofrann avek Bondye.

²⁵ Si ou annan en zafer an kour kont en dimoun, depese fer zanmi avek li letan zot ankor dan semen; sinon, ou ladverser ava anmenn ou devan ziz. Ziz ava met ou dan lanmen gard e ou ava ganny met dan prizon.

²⁶ Mon dir ou, sa i laverite: Ou pa pou sorti la ziska ki ou'n fini pey ou det ziska sa dernyen sou.

Lansennyman lo Size Adilter

²⁷ Zot in tande ki i'n ganny dir: Pa komet adilter.

²⁸ Me mwan mon dir zot: En dimoun ki get en fanm avek lanvi, i'n deza komet adilter avek li dan son leker.

²⁹ Si ou lizye drwat i fer ou tonm dan pese, aras li e zet li lwen. Vomye ou perdi en parti ou lekor, plito ki ou lekor antye i ganny zete dan lanfer.

³⁰ Si ou lanmen drwat i fer ou tonm dan pese, koup li e zet li lwen. Vomye ou perdi en parti ou lekor, plito ki ou lekor antye i ganny zete dan lanfer.

Lansennyman lo Divors

³¹ I'n ganny osi dir: En dimoun ki divors son fanm i bezwen donn li en let divors.

³² Me mwan mon dir zot: En zonm ki divors son fanm, sof dan ka ki son fanm in tronp li, i pe pous li pour komet adilter. En zonm ki marye avek en fanm divorse, i osi komet adilter.

Lansennyman lo Serman

³³ Zot in osi tande ki i'n ganny dir avek nou bann zanset: Pa kas ou serman, me akonpli bann ve ki ou'n promet par serman devan Senyer.

³⁴ Me mwan mon dir zot: Pa fer okenn serman ni par lesyel, akoz lesyel i tronn Bondye;

³⁵ ni par later, akoz later i landrwa kot i poz son lipye; ni par Zerizalenm, akoz i lavil gran Lerwa.

³⁶ Pa ni fer serman lo ou latet, akoz ou pa kapab fer en sel bren seve vin blan oubyen nwanr.

³⁷ Kan ou koze, dir wi, kan fodre dir wi; oubyen non, kan fodre dir non. Tou sa ki zot azoute, i sorti kot dyab.

Lansennyman lo Vanzans

³⁸ Zot in tande ki i'n ganny dir: Ey pour ey, dan pour dan.

³⁹ Me mwan mon dir zot: Pa tir vanzans lo en dimoun ki'n fer ou ditor. Si en dimoun i donn ou en kalot lo ou lazou drwat, prezant li lazou gos osi.

⁴⁰ Si en dimoun i anmenn ou ankour pour ou semiz, les li pran ou palto osi.

⁴¹ Si en dimoun i fors ou mars en kilomet avek li, fer de kilomet avek li.

⁴² Si en dimoun i demann ou keksoz, pa refiz li. Pa refiz en dimoun ki demann ou pret li en keksoz.

Kontan ou Lennmi

⁴³ Zot in tande ki i'n ganny dir: Kontan ou prosen e ay ou lennmi.

⁴⁴ Me mwan mon dir zot: Kontan zot bann lennmi e priy pour bann ki persekit zot.

⁴⁵ Alor, zot ava vin bann vre garson zot Papa ki dan lesyel. Annefe, i fer son soley leve lo bann ki move e lo bann ki bon; i fer tonbe lapli lo bann ki zis e lo bann ki pa zis.

⁴⁶ Si zot kontan zis bann ki kontan zot, ki rekonpans Bondye pou donn zot? Menm bann kolekter taks zot fer parey.

⁴⁷ Si zot dir bonzour zis zot bann frer, kwa ki ekstraordiner? Menm bann non-Zwif i azir konmsa.

⁴⁸ Zot alor, zot devre parfe parey zot Papa ki dan lesyel i parfe.