Matye 3 - Labib An Kreol Seselwa

Zanbatis I Pres Repantans

¹ Dan sa letan, Zanbatis ti arive sorti dan dezer Zide. I ti konmans prese:

² Sanz zot mannyer viv, akoz Rwayonm lesyel i pros.

³ Zan ti sa zonm lo ki profet Ezai ti'n dir: En lavwa pe kriye dan dezer: Prepar semen Senyer; fer drwat son bann santye!

⁴ Lenz Zan ti fer avek pwal samo e otour son leren i ti met en sang an kwir. I ti manz sotrel ek dimyel sovaz.

⁵ Bann zabitan Zerizalenm, partou dan Zide e dan rezyon larivyer Zourden ti al kot li.

⁶ Zot ti rekonnet piblikman zot pese e Zan ti batiz zot dan larivyer Zourden.

⁷ Zan ti war ki en kantite Farizyen ek Sadiseen ti vin kot li pour zot ganny batize. Alor, i ti dir zot, “Ras viper ki zot ete! Lekel ki'n aprann zot esey sap zizman Bondye ki pros?

⁸ Alor, prodwi bann bon fri ki montre ki zot in konverti.

⁹ Pa zis dir dan zot menm: Abrahanm i nou papa. Les mwan dir zot ki Bondye i kapab servi sa bann ros ki la, pour fer zot vin desandans Abrahanm.

¹⁰ Konmela menm, lars in pare la obor rasin bann pye dibwa. Tou pye dibwa ki pa raport bon fri, pou ganny koupe e zet dan dife.

¹¹ Mwan, mon batiz zot dan delo, pour montre ki zot pe sanz zot mannyer viv. Me sa enn ki vin apre mwan, i pou batiz zot avek Lespri Sen ek dife. I pli pwisan ki mwan: Mon pa diny pour tir son sandal.

¹² Son fours i dan son lanmen, pour li separ lagrenn ek lapay. I pou anmas lagrenn dan son langar rezerv, me i pou bril lapay dan dife ki pa zanmen tennyen.”

Batenm Zezi

¹³ Alor, Zezi ti arive, sorti Galile. I ti al pre kot Zan, pour li ganny batize par Zan.

¹⁴ Me Zan pa ti dakor. I ti dir li, “Mwan ki devre ganny batize par ou e se ou ki vin kot mwan?”

¹⁵ Me Zezi ti reponn li, “Aksepte pour konmela. Annefe, konmsa ki nou devre fer tou sa ki Bondye i demande.” Alor, Zan ti aksepte.

¹⁶ Zis koman i ti'n fini ganny batize, Zezi ti sorti dan delo. Alor, lesyel ti ouver pour li: I ti war Lespri Bondye desann lo li dan laform en pizon.

¹⁷ En lavwa sorti dan lesyel ti dir, “Sa i mon Garson byenneme, ki donn mwan bokou lazwa.”