Liv Zob 9 - Labib An Kreol Seselwa

Larepons Zob

¹ Zob ti reponn:

² Mon konnen tousala i vre. Me eski en imen i kapab ganny rezon devan Bondye?

³ Si en dimoun i oule diskit avek li, Bondye pa pou reponn, pa menm en sel fwa lo mil.

⁴ Bondye i ranpli avek lasazes ek pwisans. Lekel ki kapab reziste li san sibir bann konsekans?

⁵ Bondye i deplas bann montanny san ki zot konnen; dan son lakoler, i sekwe zot.

⁶ I fer later tranble lo son fondasyon. I fer li balanse lo son bann pilye.

⁷ I kapab defann soley leve e anpes zetwal briye.

⁸ Li tousel, i ti tal lesyel e mars lo bann laroul dan lanmer.

⁹ I ti plas bann konstelasyon dan lesyel: Gran Lours, Orion, Pleyad, e bann zetwal ki dan Sid.

¹⁰ I fer bann gran keksoz ki personn pa menm kapab konpran; bokou mervey ki nou pa kapab konte.

¹¹ I pas dan bor mwan, me mon pa war li; i disparet, mon pa remarke.

¹² Lekel ki kapab anpes li, si i deside pran sa ki i oule. Lekel ki pou demann li: Ki ou pe fer?

¹³ Bondye pa kontrol son lakoler. In kraz bann ki ed Rahab.

Bondye I Pli For

¹⁴ Alor, eski mon pou kapab reponn li? Eski mon pou annan parol kont li?

¹⁵ Menm si mon inosan, mon pa kapab reponn li. Mon bezwen demann mon ziz pran pitye pour mwan.

¹⁶ Menm si i reponn ler mon apel li, mon pa krwar ki i pou ekout mwan.

¹⁷ Annefe, i kraz mwan par en tanpet, e i ogmant mon blesir san rezon.

¹⁸ I pa donn mwan letan respire, me i ranpli mwan avek lanmertim.

¹⁹ Dan en paryaz lafors, i pli for. Lo kestyon lazistis, lekel ki pou konvok mwan?

²⁰ Menm si mon inosan, mon prop labous pou kondann mwan. Menm si mon inosan, i pou donn mwan tor.

²¹ Eski mon inosan? Mon pa ni konnen. Mon'n degout mon lavi.

²² Tousala pa enportan. Alor, mon dir: Inosan ou koupab, i pou detri ou.

²³ Kan dezas i anmenn lanmor sibitman, i pa pran ka maler bann inosan.

²⁴ I les dimoun malonnet pran pouvwar lo later. I ferm lizye bann ziz. Si pa Bondye ki fer sa, dir mwan lekel alor!

²⁵ Mon lavi i al pli vit ki en atlet. I pas san war nanryen ki bon.

²⁶ I glise parey en pirog. I plonze parey en leg lo son prwa.

²⁷ Si mon dir: Mon pou oubliy mon lapenn, mon pou met de kote latristes e repran kouraz,

²⁸ mon bann soufrans i fer mwan per, akoz mon konnen ki ou pa pou rekonnet mon linosans.

²⁹ Mon pou ganny kondannen. Alor, akfer fatig mwan pour nanryen?

³⁰ Si mon al lav mwan avek lannez, e netway mon lanmen avek lapoud savon,

³¹ ou pou kantmenm plonz mwan dan labou; mon lenz pou degoutan lo mwan.

³² Annefe, Bondye pa en zonm parey mwan, pour mwan kapab reponn li. Nou pa kapab al ansanm devan lakour.

³³ Napa okenn larbit ant nou, pour poz lanmen lo nou de.

³⁴ Si i ti ava anpes mwan ganny tape, e aret fer mwan per!

³⁵ Alor, mon ti ava koz avek li san lafreyer. Malerezman, sa pa leka, mon bezwen fer fas avek mwan menm.