Liv Zob 5 - Labib An Kreol Seselwa

Elifaz I Kontinyen Koze

¹ Kriye aprezan! Lekel ki pou reponn ou? Avek lekel son bann lanz ou pou adres ou?

² Lakoler i touy dimoun ensanse. Zalouzi i detri bann fou.

³ Mon'n war bann fou dan bon sityasyon. Me mon pa ti tarde demann sa malediksyon lo zot lakaz:

⁴ Son bann zanfan pa ganny okenn sekour; devan tribinal, zot ava ganny akize, san personn pour defann zot.

⁵ Dimoun ki pe mor lafen ava manz zot rekolt. Zot ava pran menm sa ki pous dan pikan! Dimoun anvye ava pran tou zot larises.

⁶ Annefe, lenzistis pa sorti dan later; lanmizer pa pous dan later.

⁷ Zonm in ne pour soufer. Parey bann letensel i anvole dan ler.

⁸ Dan ou plas, mon ti ava rod Bondye. Devan Bondye ki mon ti pou met mon konplent.

⁹ Bondye i fer bann gran mervey, ki personn pa kapab konpran.

¹⁰ I fer lapli tonbe lo later. I anvoy delo dan plantasyon.

¹¹ I relev bann ki'n ganny abese, e sa ki dan lapenn, i retrouv lazwa.

¹² I deranz proze dimoun rize; zot pa reisi dan sa ki zot fer.

¹³ Bondye i pran bann saz dan zot prop pyez, e zot bann fo proze pa abouti dan nanryen.

¹⁴ Dan gran lizour, zot bite dan fernwanr. Zot tat zot semen dan gran lizour, konmsi aswar.

¹⁵ Me Bondye i sov bann pov kont lepe zot labous, i tir zot dan lanmen bann pwisan.

¹⁶ Alor, pour bann pov i annan lespwar, e lenzistis i ferm son labous.

¹⁷ I ere, sa enn ki Bondye i korize! Alor, pa refiz koreksyon Bondye Toupwisan.

¹⁸ Bondye ki blese e ki panse. Sa enn ki i fer soufer, son lanmen i geri.

¹⁹ I pou delivre ou sis fwa dan tourman, e pandan set fwa, i pou eparny ou dan maler.

²⁰ Dan lafanmin, i pa pou les ou mor; dan lager i pa pou les ou ganny touye.

²¹ Ou pou ganny proteze kont bann mansonz; ou pa bezwen per kan maler i vini.

²² Dan letan ladizet koman dan dezas, ou pou zis riye; ou pa pou per okenn zannimo sovaz.

²³ Pa pou annan okenn ros dan ou plantasyon. Zannimo sovaz pa pou zanmen atak ou.

²⁴ Alor, ou ava viv anpe kot ou. Kan ou ava enspekte ou troupo, okenn ou zannimo pa pou manke.

²⁵ Ou pou ganny ankor bokou zanfan, e ou bann pti zanfan pou pouse parey zerb dan laplenn.

²⁶ Ou pou ranpli avek lafors ziska dan ou vyeyes, parey dible ki'n ler pour rekolte.

²⁷ Nou'n egzamin tousala e i vre. Aprezan, aksepte e met zot an pratik!