Liv Zob 2 - Labib An Kreol Seselwa

Lakizater I Teste Zob ankor

¹ En zour, kan bann garson Bondye ti prezant zot devan SENYER, Lakizater osi ti vin parmi zot pour prezant li devan SENYER.

² SENYER ti demann Lakizater, “Kote ou sorti?” Lakizater ti reponn li, “Mon sorti pronmnen en pe partou lo later.”

³ SENYER ti demann li, “Eski ou'n remark mon serviter Zob? Napa personn koman li lo later. I en zonm zis e drwat. I annan bokou respe pour Bondye e i evite fer sa ki mal. I reste touzour fidel, menm si ou'n pous mwan pour detri li san rezon.”

⁴ Lakizater ti reponn SENYER, “Sa i normal; en zonm i donn tou sa ki i posede pour li sov son lavi.

⁵ Me zis lev ou lanmen e tous son lezo ek son laser. Mon asire ki i pou modi ou dan ou figir!”

⁶ SENYER ti dir Lakizater, “Dakor! Mon kit li dan ou pouvwar. Me pa tous son lavi.”

Dezyenm Maler

⁷ Alor, Lakizater ti kit prezans SENYER. I ti al atak Zob avek en move maladi lapo, depi son plak lipye ziska son lapo latet.

⁸ Zob ti pran en morso po kase pour grat li avek e i ti asiz lo en ta lasann.

⁹ Son fanm ti dir li, “Ou kontinyen reste fidel. Modi Bondye e apre mor!”

¹⁰ Me i ti reponn li, “Ou koz koman en fanm fol! Bondye i donn nou sa ki bon e i anvoy maler osi!” Dan tousala, Zob pa ti dir nanryen kont Bondye.

Trwa Zanmi I Vin Konsol Zob

¹¹ Trwa zanmi Zob ti antann tou sa bann maler ki ti'n ariv li. Zot ti vini sorti dan zot pei: Elifaz sorti Temann, Bildad sorti Soua e Sofar sorti Naama. Zot ti tonm dakor pour al senpatiz avek li e konsol li.

¹² Zot ti war li dan lwen, me zot pa ti rekonnet li. Alor, zot ti plere asodlarm. Zot ti desir zot lenz e anvoy lapousyer anler par lao zot latet.

¹³ Zot ti asiz ater obor li pandan set zour ek set nwit. Personn pa ti dir li en mo, akoz zot ti war ki i ti pe soufer bokou.