Liv Zob 13 - Labib An Kreol Seselwa

Laswit Larepons Zob

¹ Tou sa ki zot in dir, mon lizye in war, mon zorey in tande e mon'n konpran.

² Mwan osi, mon konn sa ki zot konnen. Mon pa pli bet ki zot.

³ Me avek Bondye Toupwisan ki mon oule koze; mon oule defann mon ka devan li.

⁴ Me zot, zot kasyet deryer mansonz; zot en bann fo dokter.

⁵ Si selman zot ti aret koze! Sa ti ava siny lasazes.

⁶ Aprezan, ekout mon defans. Port atansyon mon parol.

⁷ Eski zot kapab defann Bondye avek mansonz? Eski zot koz dan son faver?

⁸ Eski zot vreman lo kote Bondye? Eski zot kapab defann li devan lakour?

⁹ Eski zot pou dan bon, ler i ava teste zot? Eski zot kapab tronp li parey dimoun i tronp kanmarad?

¹⁰ I pou sirman repros zot si zot esey fer preferans, menm an sekre.

¹¹ Eski son mazeste pa pou fer zot per? Eski son lafreyer pa pou tonm lo zot?

¹² Zot bann argiman napa plis valer ki lasann; Zot defans i fay parey en po later.

¹³ Reste trankil e les mwan koze; Tanpi sa ki kapab ariv mwan.

¹⁴ Mon'n pare pour tou, ziska riske mon lavi.

¹⁵ I kapab touy mwan, mon napa nanryen pour perdi. Me mon pou defann mwan devan li.

¹⁶ Sa i kapab bon pour mwan, akoz en move dimoun pa pou oze prezant devan li.

¹⁷ Ekout byen sa ki mon pou dir. Ouver zot zorey gran pour byen konpran mon lesplikasyon.

¹⁸ Mon pare pour al devan lakour; mon konnen ki mon annan rezon.

¹⁹ Lekel ki pou vin akiz mwan devan tribinal? Mon aksepte alor pour gard silans e mon ava mor.

²⁰ Akord mwan zis de keksoz, e mon pa ava kasyet mwan devan ou.

²¹ Met ou lanmen lwen avek mwan; aret fer mwan per ou.

²² Ou koz premye, apre mon ava reponn. Oubyen, les mwan koz avan, apre ou ava reponn.

²³ Ki kantite fot ek pese mon'n fer? Fer mwan konn mon bann krim ek mon bann pese.

²⁴ Akoz ou kasyet ou figir avek mwan e ou konsider mwan koman ou lennmi?

²⁵ Eski ou pou fer tranble en fey sek ki anvole dan divan, Eski ou pou pourswiv en bren lapay sek?

²⁶ Ou ekri bann keksoz terib kont mwan; ou fer mwan pey pour mon bann fot lazenes.

²⁷ Ou met mon lipye dan fer; ou vey tou mon bann mouvman; ou vey tou mon lepa.

²⁸ Zonm i karyate, parey en lenz ki'n ganny manze par karya.