Liv Zob 10 - Labib An Kreol Seselwa

¹ Mon degout mon lavi. Mon pou fer konnen tou mon lapenn; mon pou dir tou sa ki lo mon leker.

² Mon pou dir Bondye: Pa kondann mwan. Fer mwan konnen ki repros ou annan kont mwan.

³ Ki plezir ou gannyen pour fer mwan soufer, pour ou mepriz ou prop kreatir e fer reisi proze bann malfeter?

⁴ Eski ou annan lizye parey en imen? Eski ou war parey bann imen?

⁵ Eski ou lavi i parey pour zonm? Eski ou bann lannen i kourt parey pour bann imen?

⁶ Akoz alor, ou oule konn mon fot e rode ki pese mon'n fer?

⁷ Me ou konnen ki mon pa koupab, e ki personn pa kapab aras mwan dan ou lanmen.

⁸ Ou lanmen in form mwan, in kree mwan. La aprezan, ou oule detri mwan!

⁹ Pa oubliye ki ou ti kre mwan avek larzil. Eski ou anvi fer mwan retourn dan lapousyer?

¹⁰ Pa ou ti fer mwan koule parey dile, e fer kaye parey fromaz?

¹¹ Ou ti met lapo ek laser lo mwan. Ou ti met ansanm tou bann lezo ek bann nerf.

¹² Ou'n donn mwan lavi ek lafors. Ou'n pran swen avek mwan pour gard mwan vivan.

¹³ Me ou ti pe gard tousala dan ou leker. Me mon konn ou lentansyon.

¹⁴ Si mon fer pese, ou vey mwan e ou pa pardonn mwan.

¹⁵ Maler, si mon fer en pese! Menm kan mon fer sa ki byen, mon pa oze lev mon latet, akoz mon kouver avek laont ek soufrans.

¹⁶ Me konman mon lev latet, ou sas mwan parey en tig. Ou kraz mwan ankor anba ou pwisans.

¹⁷ Ou anmenn nouvo temwen kont mwan. Ou lakoler kont mwan i ogmante. Ou anvoy nouvo troup pour atak mwan.

¹⁸ Akoz ou'n fer mwan sorti dan vant mon manman? Mon ti ava'n mor san personn war mwan;

¹⁹ konmsi mon pa'n zanmen egziste: Depi vant mon manman, mon ti ava'n ganny anmennen dan latonm.

²⁰ Mon napa lontan pour viv. Alor, les mwan trankil; les mwan anmiz en pe,

²¹ avan mon al dan pei fernwanr lanmor pour pa zanmen retournen;

²² dan sa pei kot lannwit i renny lo dezord, kot lalimyer i parey teneb.