Levitik 9 - Labib An Kreol Seselwa

Premye Sakrifis Aaron

¹ Wityenm zour, Moiz ti konvok Aaron, son bann garson, ek tou bann ansyen dan Izrael.

² I ti dir Aaron, “Pran en zenn toro pour sakrifis pardon pese, ek en mouton mal pour sakrifis konplet; tou le de i devre san defo. Prezant zot devan SENYER.

³ Ou ava dir pep Izrael: Pour sakrifis pardon pese, pran en bouk, en zenn bef ek en zenn mouton, aze enn an e san okenn defo; pour en sakrifis konplet,

⁴ en toro ek en mouton mal, pour prezant devan SENYER koman en sakrifis lape, ansanm avek en lofrann vezetal petri avek delwil. Ozordi SENYER pou aparet avek zot.”

⁵ Zot ti anmenn devan Latant Rankont tou sa ki Moiz ti'n demande. Alor, pep Izrael antye ti aprose e rasanble devan SENYER.

⁶ Moiz ti dir, “La sa ki SENYER in ordonnen pour fer, pour ki laglwar SENYER i aparet avek zot.”

⁷ Apre, Moiz ti dir Aaron, “Avans devan kot lotel, e ofer ou sakrifis pour pardon pese, ek sakrifis konplet e fer rityel pour pardon ou prop pese e pour pese lepep. Apre, ofer sakrifis pour lepep e fer rityel pour pardon zot pese, parey SENYER in ordonnen.”

⁸ Alor, Aaron ti apros kot lotel, e egorz sa zenn bef pour sakrifis pardon son prop pese.

⁹ Son bann garson ti prezant li disan. I ti tranp son ledwa dan sa disan e pas li lo bann korn lotel; i ti vers leres disan ater otour lotel.

¹⁰ I ti bril tou lagres, ronnyon, bann morso lefwa sa zannimo pour pardon pese e bril zot lo lotel, parey SENYER ti'n ordonn Moiz.

¹¹ I ti bril lavyann sa zenn bef ek son lapo an deor kan.

¹² Apre, i ti egorz zannimo pour sakrifis konplet. Son bann garson ti prezant li disan e i ti fer laspersyon otour lotel.

¹³ Zot ti osi prezant li zannimo sakrifis konplet koupe an morso avek latet e i ti bril tou lo lotel.

¹⁴ I ti lav trip ek bann lapat e bril zot lo lotel, ansanm avek sakrifis konplet.

¹⁵ Answit, i ti prezant sakrifis pour lepep. I ti pran sa bouk pour sakrifis pardon pese lepep. I ti egorz li e ofer pour pardon pese, parey i ti fer avek sa enn avan.

¹⁶ I ti prezant sakrifis konplet, ki i ti ofer dapre regleman.

¹⁷ I ti osi prezant lofrann vezetal. I ti pran en ponnyen lafarin e bril li lo lotel. Sa ti anplis ki sakrifis konplet ki ganny ofer tou le bomaten.

¹⁸ Aaron ti egorz sa zenn toro ek sa zenn mouton mal, koman en sakrifis lape pour lepep. Son bann garson ti prezant li disan ki i ti asperz otour lotel.

¹⁹ Zot ti osi remet li bann morso lagres toro ensi ki lake mouton ek tou lagres ki anvlop son trip, son bann ronnyon, ek bann morso lefwa.

²⁰ Zot ti plas sa bann morso lagres lo pwatrin sa de zannimo e bril lagres lo lotel.

²¹ Aaron ti ofer SENYER bann morso pwatrin ek porsyon kwis drwat ki i ti prezant devan SENYER, parey Moiz ti'n ordonnen.

²² Aaron ti lev son lanmen anler ver lepep e beni zot. Kan i ti'n fini ofer sakrifis pour pardon pese, sakrifis konplet, ek sakrifis lape, i ti redesann.

²³ Moiz ek Aaron ti antre dan Latant Rankont. Kan zot ti sorti, zot ti beni lepep e laglwar SENYER ti aparet devan lepep antye.

²⁴ En dife ti sorti devan SENYER e devor sakrifis konplet ek lagres lo lotel. Pep Izrael antye ti war sa; zot ti kriye avek lazwa e tonm lafas ater.