Levitik 26 - Labib An Kreol Seselwa

Rekonpans pour Lobeisans

¹ Zot pa pou fer okenn fo bondye, ni fabrik okenn stati, ni okenn pilye ros sakre. Zot pa pou fer okenn stati taye dan zot pei pour zot prostern devan zot. Mwan menm SENYER, zot Bondye.

² Zot ava obzerv mon bann saba, e montre gran respe pour mon sanktyer: Mwan menm SENYER.

Benediksyon

³ Si zot swiv mon bann regleman, si zot gard mon bann komannman e met zot an pratik,

⁴ mon ava donn zot lapli an sezon. Later ava prodwir bann rekolt e bann pye dibwa ava raport fri.

⁵ Zot ava bat dible ziska letan rekolt rezen. Zot ava rekolte rezen ziska letan pour senm legren i ariv ankor. Zot ava manz zot dipen ziska zot ava rasazye. Zot ava viv an sekirite dan zot pei.

⁶ Mon pou met lape dan pei; personn pa pou vin trakas zot. Mon pou detri bann zannimo feros dan pei e lepe pa pou travers zot pei.

⁷ Zot ava pourswiv zot bann lennmi ki ava tonm anba zot lepe.

⁸ Senk parmi zot ava pourswiv 100 lennmi, e 100 parmi zot ava pourswiv 10,000 lennmi. Zot lennmi ava tonbe devan zot, anba zot lepe.

⁹ Mon pou pran swen avek zot. Mon pou donn zot bokou zanfan e fer zot popilasyon ogmante; mon pou gard mon lalyans avek zot.

¹⁰ Zot ava manz zot vye rekolt dible e defalke bann ansyen rekolt pour fer plas pour sa ki nouvo.

¹¹ Mon pou vin reste parmi zot; mon pa pou abandonn zot.

¹² Mon pou mars parmi zot; mon pou vin zot Bondye e zot ava vin mon pep.

¹³ Mwan menm SENYER zot Bondye ki ti fer zot sorti Lezip pour ki zot pa vin lesklav ankor. Mon'n tir bann fardo lo zot zepol; zot ava kapab mars avek lafyerte.

Pinisyon pour Dezobeisans

¹⁴ Me, si zot pa ekout mwan e pa met an pratik tou sa bann komannman,

¹⁵ si zot rezet mon bann regleman, mepriz mon bann lalwa; si zot pa obzerv mon bann komannman, si zot kas mon lalyans,

¹⁶ la sa ki mon pou fer zot: Mon pou anvoy maler, maladi enkirab ek lafreyer lo zot. Zot pou vin aveg e zot pou deperi. Zot ava senm legren anven, akoz zot lennmi ki pou rekolte.

¹⁷ Mon pou abandonn zot e zot lennmi ava ganny laviktwar lo zot. Dimoun ki deteste zot ava domin zot e zot ava sove san ki personn i pourswiv zot.

¹⁸ Si malgre tousala, zot pa ekout mwan, mon pou kontinyen pini zot set fwa plis ankor pour zot pese.

¹⁹ Mon pou detri lorgey zot lafors e mon pou fer zot lesyel vin dir koman fer e zot later koman kwiv.

²⁰ Zot ava trimouse, me anven. Zot later pa pou donn okenn rekolt e bann pye dibwa pa pou prodwir okenn fri.

²¹ Si zot kontinyen reziste kont mwan e refize ekout mwan, mon pou ogmant zot pinisyon set fwa plis ankor pour zot pese.

²² Mon pou anvoy kont zot bann zannimo sovaz ki ava touy zot bann zanfan e detri zot bann troupo. Zot pou disparet e zot semen pou vin dezer.

²³ Si malgre sa, zot pa retourn kot mwan, me zot kontinyen reziste,

²⁴ mwan osi, mon pou reste kont zot. Mon pou pini zot set fwa plis pour zot bann pese.

²⁵ Mon pou anvoy lager kont zot, pour pini zot akoz mon lalyans. Si zot al pran refiz dan bann lavil, mon pou anvoy lepidemi parmi zot, e zot ava tonm dan lanmen lennmi.

²⁶ Mon pa pou donn zot dipen. Dis fanm ava kwi zot dipen dan en sel four. Manze pou ganny rasyonnen; zot ava manze, me zot pou ankor lafen.

²⁷ Si, malgre tousala, zot pa ekout mwan, e kontinyen opoz mwan,

²⁸ mwan osi, mon pou osi kontinyen opoz zot avek lakoler. Mon pou koriz zot set fwa plis pour zot bann pese.

²⁹ Zot ava manz laser zot bann garson e zot ava manz laser zot bann fiy.

³⁰ Mon pou detri zot bann landrwa sakre e fer disparet zot bann lotel lansan. Mon pou met zot kadav an ta lo kadav zot bann zidol. Mon pou annan degou pour zot.

³¹ Mon pou fer zot bann lavil vin en ta debri, devaste zot bann sanktyer; mon pa pou aksepte loder zot bann lofrann.

³² Mon pou devaste pei. Zot bann lennmi ki ava vin reste la, ava etonnen.

³³ Mon pou dispers zot parmi bann nasyon e anvoy lager kont zot. Zot pei pou vin en dezolasyon e zot bann lavil ava vin en ta debri.

³⁴ Alor, pandan tou sa bann lannen dezolasyon, ler zot ava dan pei zot bann lennmi, zot pei ava dan repo saba. Alor, pei ava repoze e akonpli son bann saba.

³⁵ Pandan tou sa letan dezolasyon, pei ava kapab repoze e ranplas bann saba ki pa'n ganny respekte ler zot ti pe reste la.

³⁶ Pour sa bann ki ava'n reste dan pei, mon pou anvoy dekourazman lo zot dan pei zot bann lennmi. Tapaz en fey ki tonbe pou fer zot per. Zot pou sove konmsi zot ti pe sov lennmi. Zot pou tonbe menm si personn pa ti pe pourswiv zot.

³⁷ Zot pou tonm enn lo lot, konmsi zot pe sove devan lennmi, san ki personn pe pourswiv zot. Zot pa pou annan lafors pour reziste kont bann lennmi.

³⁸ Zot pou mor parmi bann nasyon etranze e pei zot bann lennmi ava devor zot.

³⁹ Bann sirvivan dan pei zot bann lennmi, ava deperi pa zis akoz zot bann pese, me osi akoz pese zot bann zanset.

Bondye Ava Rapel Son Lalyans

⁴⁰ Me si zot rekonnet zot pese e pese zot zanset, e avoue ki zot in komet en sakrilez kont mwan, e ki zot in kontinyen opoz mwan,

⁴¹ zot ava konpran ki mwan osi, mon'n opoz zot e anmenn zot dan pei zot bann lennmi. Si zot imilye zot e aksepte pinisyon pour zot pese,

⁴² alor, mon ava rapel mon lalyans avek Zakob. Mon ava osi rapel mon lalyans avek Izaak e avek Abrahanm e mon ava mazin pei.

⁴³ Konmsa, bann lennmi ava abandonn pei. Pandan ki i dan dezolasyon, i ava akonpli son saba. Alor, zot ava aksepte mon pinisyon, akoz zot in oze rezet mon bann regleman e mepriz mon bann lalwa.

⁴⁴ Malgre tousala, mon pa pou rezet zot, ni ay zot e detri zot konpletman, ni kas mon lalyans avek zot, ler zot ava dan pei zot lennmi. Annefe, mwan menm SENYER zot Bondye.

⁴⁵ Mon pou rapel mon lalyans ki mon ti fer avek zot bann zanset ler zot ti sorti Lezip, anba lizye bann nasyon, pour mwan vin zot Bondye. Mwan menm SENYER.

⁴⁶ Sa i bann regleman, bann lalwa ek bann komannman ki SENYER in etabli ant li ek pep Izrael lo Montanny Sinai, par lentermedyer Moiz.