Levitik 24 - Labib An Kreol Seselwa

Bann Lalanp pour Sanktyer

¹ SENYER ti koz avek Moiz:

² Donn lord pep Izrael pour donn ou delwil doliv meyer kalite pour ki lalanp sanktyer i reste kontinyelman alimen.

³ Aaron ava enstal sa lalanp devan rido Latant Rankont, deryer rido lalyans, pour ki i reste alimen devan SENYER depi aswar ziska bomaten. Sa i ava en regleman pour touzour pour bann zenerasyon.

⁴ Aaron ava plas bann lalanp lo en portlanp annor pir, pour ki zot brile kontinyelman devan SENYER.

Dipen pour Sanktyer

⁵ Ou ava pran lafarin meyer kalite e ou ava fer 12 gato sis kilo sakenn.

⁶ Ou ava plas sa bann gato par ranze sis devan SENYER, lo en latab annor pir.

⁷ Ou ava depoz lansan pir lo sak ranze. Sa i ava ranplas dipen koman lofrann brile par dife an loner SENYER.

⁸ Sak zour saba, Aaron ava poz sa bann dipen, pour ki zot reste kontinyelman devan SENYER koman en lofrann. Pep Izrael ava gard sa koman en lalyans pour touzour.

⁹ Sa bann dipen ava pour Aaron ek son bann garson; zot ava manz li dan en landrwa sen. Annefe, sa i ava en keksoz tre sakre parmi bann lofrann brile an loner SENYER. Sa i en regleman pour touzour.

Pinisyon pour Blasfenm

¹⁰ En zour dan kan, parmi pep Izrael, ti annan en dispit ant en Izraelit ek en zonm ki son papa ti en Ezipsyen e son manman en Izraelit.

¹¹ Garson sa fanm Izraelit ti blasfenm non SENYER e ensilte li. I ti ganny anmennen devan Moiz. Sa fanm Izraelit ti apel Selomit, fiy Dibri, sorti dan tribi Dann.

¹² Zot ti gard li an detansyon ziska ki en desizyon sorti kot SENYER i ganny pran.

¹³ SENYER ti dir Moiz:

¹⁴ Fer sa enn ki'n blasfenmen sorti an deor kan. Sa bann ki'n antann li ensilte mon non, ava poz zot lanmen lo son latet. Apre, kominote ava saboul li avek ros.

¹⁵ Ou ava dir bann Izraelit: Sa enn ki ensilte son Bondye ava responsab son pese.

¹⁶ Sa enn ki blasfenm non SENYER ava ganny touye; kominote ava touy li. Etranze koman sitwayen ki blasfenm non SENYER ava ganny touye.

¹⁷ En dimoun ki touy en et imen ava li osi ganny touye.

¹⁸ Sa enn ki touy en zannimo ava ranplas li: En lavi kont en lavi.

¹⁹ En dimoun ki bles son prosen ava sibir menm sor:

²⁰ Blesir pour blesir, lizye pour lizye, ledan pour ledan. I ava ganny blese menm fason ki i'n bles en lot dimoun.

²¹ Sa enn ki touy en zannimo ava ranplas li. Me sa enn ki touy en et imen ava li osi ganny touye.

²² Menm lalwa ava aplik pour en etranze koman pour en Izraelit.

²³ Moiz ti transmet sa bann lalwa avek pep Izrael. Zot ti anmenn sa zonm ki ti blasfenmen an deor kan kot zot ti saboul li avek ros e touy li parey SENYER ti'n ordonn Moiz.