Levitik 20 - Labib An Kreol Seselwa

Bann Pratik Relizye ki Defann

¹ SENYER ti koz avek Moiz:

² Dir bann Izraelit: Sa enn parmi pep Izrael oubyen parmi bann etranze ki reste Izrael ki ofer bondye Molek enn zot bann zanfan an sakrifis, ava ganny touye. Lepep ava saboul zot avek ros.

³ Mwan menm, mon pou tourn kont sa zonm. Mon pou sas li parmi mon pep akoz in donn enn son zanfan bondye Molek, rann enpir mon sanktyer e dezonor mon non sen.

⁴ Si bann zabitan sa pei i ferm zot lizye e zot pa touy sa zonm ki'n donn son zanfan Molek,

⁵ mwan menm, mon pou tourn kont li e kont son fanmir. Mon pou sas li parmi son pep, li avek tou sa bann ki'n swiv li pour al fer prostitisyon avek Molek.

⁶ Sa enn ki al konsilte bann medyonm ek lespri dimoun mor pour li prostitye son lekor, mon pou tourn kont li e sas li parmi lepep.

⁷ Alor, konport zot koman bann sen, akoz mwan menm SENYER zot Bondye.

⁸ Gard mon bann regleman e met zot an pratik. Mwan menm SENYER ki rann zot sen.

⁹ Sa enn ki ensilte son papa oubyen son manman, ava ganny touye akoz i'n dezonor son papa oubyen son manman. Alor, i ava responsab son prop lanmor.

¹⁰ Si en zonm i komet adilter avek fanm son prosen, tou le de, sa zonm adilter ek sa fanm adilter, ava ganny touye.

¹¹ Si en zonm i dormi avek fanm son papa, i'n dezonor son papa; tou le de ava ganny touye. Zot ava responsab zot lanmor.

¹² Si en zonm i dormi avek son belfiy, tou le de devre ganny touye; zot in fer en aksyon degoutan. Zot ava responsab zot lanmor.

¹³ Si en zonm i dormi avek en zonm, parey i dormi avek en fanm, tou le de in komet en aksyon degoutan. Zot devre ganny touye; zot ava responsab zot lanmor.

¹⁴ I imoral pour en zonm, marye avek en fanm e osi avek son manman. Sa zonm ek sa de fanm ava ganny brile anmor. Konmsa, sa aksyon ki fer onte, ava disparet parmi zot.

¹⁵ Si en zonm i ganny relasyon seksyel avek en zannimo, i ava ganny touye. Sa zannimo osi ava ganny touye.

¹⁶ Si en fanm i apros en zannimo pour akouple avek li, ou ava touy sa fanm ek sa zannimo. Tou le de ava ganny touye; zot ava responsab zot lanmor.

¹⁷ Si en zonm i marye avek son ser, fiy son papa oubyen fiy son manman, e ki zot war touni kanmarad, sa i en aksyon ki fer onte. Zot devre ganny sase parmi lepep; i'n dormi avek son ser e i merit ganny pini.

¹⁸ Si en zonm i dormi avek en fanm pandan son reg e i war son touni, e sa fanm in les li war kot disan pe sorti, tou le de ava ganny rezete parmi zot pep.

¹⁹ Ou pa devre dormi avek ser ou manman, ni ser ou papa. Si ou'n fer sa, ou'n dormi avek ou fanmir pros; tou le de ava ganny pini. Zot ava responsab konsekans zot move aksyon.

²⁰ Si en zonm i dormi avek fanm son tonton, i dezonor son tonton. Zot ava ganny pini; zot ava mor san zanfan.

²¹ Si en zonm i pran fanm son frer, i sali li; i'n dezonor son frer. Zot pa pou ganny okenn zanfan.

²² Zot ava gard tou mon bann lalwa ek tou mon bann regleman e met zot an pratik, pour ki sa pei kot mon pou fer zot antre, pa rezet zot.

²³ Zot pa pou swiv bann pratik sa nasyon ki mon pou sas devan zot. Akoz zot in pratik tousala, ki zot in vin degoutan pour mwan.

²⁴ Mon ti dir zot: Zot pou erit zot later; mwan ki pou fer zot pran posesyon; sa i en pei kot dile ek dimyel i koule annabondans. Mwan menm zot Bondye ki'n separ zot avek bann pep.

²⁵ Alor, zot ava fer distenksyon ant zannimo pir ek zannimo enpir; ant zwazo enpir ek zwazo pir. Konmsa, zot pa ava rann zot enpir akoz sa bann zannimo, sa bann zwazo ek tou sa ki bouze lo later, tou sa ki mon'n met apar pour ki zot pa ganny konsidere enpir.

²⁶ Zot ava sen pour mwan, akoz mwan SENYER mon sen e mon'n separ zot avek lezot pep pour zot vin pour mwan.

²⁷ En zonm oubyen en fanm ki envok en medyonm oubyen lespri dimoun mor ava ganny touye; i ava ganny saboule avek ros. I ava responsab son prop lanmor.