Levitik 11 - Labib An Kreol Seselwa

Zannimo Pir ek Zannimo Enpir

¹ SENYER ti koz avek Moiz ek Aaron:

² Dir avek pep Izrael: Parmi bann zannimo lo later, la sa bann ki zot kapab manze:

³ Zot ava kapab manz bann zannimo ki annan sabo fann an de e ki rimin zot manze.

⁴ Me parmi bann ki annan sabo fann an de oubyen ki rimin zot manze, zot pa devre manz sa bann zannimo swivan: Samo, ki rimin son manze, me i napa sabo fann an de; ou ava konsider li koman enpir.

⁵ Daman, ki rimin son manze, me i napa sabo fann an de; ou ava konsider li koman enpir.

⁶ Lapen, ki rimin son manze, me i napa sabo fann an de; ou ava konsider li koman enpir.

⁷ Koson, ki annan sabo fann an de, me i pa rimin son manze; ou ava konsider li koman enpir.

⁸ Ou pa devre manz zot lavyann, ni tous zot kadav; ou ava konsider zot koman enpir.

⁹ Parmi sa bann zannimo ki viv dan delo, la sa ki zot ava manze: Tou bann zannimo ki viv dan delo, swa dan lak, ouswa dan larivyer, ki annan nazwar ek lekay. Sa ou ava kapab manze.

¹⁰ Me parmi tou sa bann ki viv dan lanmer oubyen dan larivyer, bann ki napa nazwar ek lekay, parmi bann pti bebet ki viv dan delo, zot pa devre manze; ou ava konsider zot koman en keksoz degoutan.

¹¹ Zot ava reste koman en keksoz degoutan; ou pa pou manz zot lavyann. Ou ava konsider zot kadav koman en keksoz degoutan.

¹² Tou sa ki viv dan delo e ki napa nazwar ek lekay ava ganny konsidere koman en keksoz degoutan.

¹³ Parmi bann zwazo, la bann ki zot devre ganny konsidere koman en keksoz degoutan, e ki zot pa devre manze: Leg, votour, leg maren,

¹⁴ milan, tou bann diferan lespes votour,

¹⁵ tou bann lespes korbo,

¹⁶ lotris, ibou, mouet, tou bann lespes lepervye,

¹⁷ ibou, kormoran, katiti,

¹⁸ siny, pelikan ek floranten,

¹⁹ sigonny, eron ek zot bann lespes, korbizo ek sovsouri.

²⁰ Ou ava konsider bann pti bebet avek lezel ki mars lo zot kat lapat koman degoutan.

²¹ Me parmi bann pti bebet avek lezel e ki mars lo kat lapat, ou ava kapab manz sa bann ki annan lazanm par lao zot lapat pour zot sote.

²² La sa bann ki ou ava kapab manze: Bann diferan lespes krike ek sotrel, bann kasbol dapre zot lespes, dan zot diferan staz lavi.

²³ Ou ava konsider koman degoutan, tou lezot pti bebet avek lezel e ki annan kat lapat.

Zannimo Enpir

²⁴ La bann zannimo ki rann ou enpir. Sa enn ki tous zot kadav ava enpir ziska aswar.

²⁵ Sa enn ki anmenn nenport ki parti en kadav sa bann zannimo, ava bezwen lav son lenz e i ava reste enpir ziska aswar:

²⁶ Tou zannimo ki sabo pa fann ande, oubyen ki pa riminen, ava ganny konsidere koman enpir. Sa enn ki tous zot kadav, ava vin enpir.

²⁷ Tou zannimo ki annan kat lapat e ki napa sabo i enpir. Sa enn ki tous zot kadav ava vin enpir ziska aswar.

²⁸ Sa enn ki anmenn bann kadav ava lav son lenz e i ava vin enpir ziska aswar. Ou ava konsider zot koman enpir.

²⁹ Parmi bann pti bebet ki ranpli later, ou ava konsider sa bann koman enpir: Tang, souri, bann diferan lespes lezar,

³⁰ geko, kayman, torti, lezar, lezar disab, kameleon.

³¹ Ou ava konsider zot koman enpir. Sanmenm sa bann pti bebet ki enpir pour ou. Sa enn ki tous kadav enn sa ba bann zannimo ki'n mor, ava vin enpir ziska aswar.

³² Si en lobze i tonm lo enn sa bann pti bebet ki'n mor, sa lobze ava enpir. Nenport lobze an bwa, lenz, lapo oubyen en sak, tou keksoz ki ganny servi, ava ganny tranpe dan delo e ava vin enpir ziska aswar. Apre, i ava revin pir.

³³ Si enn sa bann pti bebet i tonm dan en resipyan anter, tou sa ki dan sa resipyan ava vin enpir; ou ava kraz sa resipyan.

³⁴ Tou nouritir ki kapab ganny manze ava vin enpir si ou vid delo ki sorti dan sa resipyan lo la; tou labwason ki ti dan enn sa bann resipyan ava vin enpir.

³⁵ Okenn lobze ki kadav enn sa bann zannimo i tonm lo la, pou vin enpir: En four oubyen en reso ava ganny kraze an morso; zot enpir e zot ava konsider sa bann lobze koman enpir.

³⁶ Me si en zannimo mor i tonm dan en sours delo oubyen dan en sitern delo, sa delo ava reste pir. Me sa enn ki tous sa kadav ava vin enpir.

³⁷ Si enn sa pti bebet oubyen zannimo mor i tonm lo bann legren ki devre ganny senmen, sa legren ava reste pir.

³⁸ Me si delo in deza ganny met lo bann legren e en kadav i tonm lo la, sa bann legren ava vin enpir.

³⁹ Si en zannimo ki ou kapab manze i mor, sa enn ki tous son kadav ava vin enpir ziska aswar.

⁴⁰ Sa enn ki manz lavyann sa kadav ava lav son lenz; i ava enpir ziska aswar. Sa enn ki transport sa kadav ava lav son lenz; i ava vin enpir ziska aswar.

⁴¹ Tou bann pti bebet ki ranpli later ava ganny konsidere degoutan; personn pa devre manz zot.

⁴² Zot pa pou manz okenn sa bann pti bebet ki ranpli later, ni sa bann ki ranpe lo zot vant, ni sa bann ki mars lo kat lapat, oubyen plis; zot ava ganny konsidere koman degoutan.

⁴³ Pa rann zot menm degoutan akoz sa bann pti bebet ki ranpli later. Pa les zot vin enpir, akoz zot; pa rann zot lekor enpir.

⁴⁴ Mwan menm SENYER zot Bondye. Alor, zot devre sen, akoz mwan mon sen. Pa rann zot enpir avek tou sa bann pti bebet ki ranpli later.

⁴⁵ Mwan menm SENYER ki ti fer zot monte sorti Lezip, pour ki mon vin zot Bondye. Zot ava sen akoz mwan, mon sen.

⁴⁶ Sa i bann lalwa ki konsern zannimo ki viv lo later, zwazo ek tou bann kreatir ki bouze dan delo e tou bann pti bebet ki grouye lo later.

⁴⁷ I permet zot fer diferans ant sa ki pir avek sa ki enpir; ant bann kreatir vivan ki ou kapab manze avek sa bann ki ou pa kapab manze.