Let Zak 5 - Labib An Kreol Seselwa

Lavertisman pour bann Ris

¹ Zot bann ris! Aprezan ekoute: Plere, kriye akoz bann maler ki pou tonm lo zot.

² Zot larises in pouri e zot lenz in ganny manze par karya.

³ Zot lor ek zot larzan in kouver avek larouy. Sa larouy pou servi koman temwen kont zot e pou devor zot laser parey dife. Zot in anmas bann trezor pour lafen letan.

⁴ La sa ki'n arive: Lapey bann zouvriye ki'n travay dan zot plantasyon, e ki pa'n ganny peye, pe kriye. Konplent bann ki fer zot rekolt in ariv ziska dan zorey Senyer liniver.

⁵ Zot in viv lo later dan liks e dan plezir. Zot in vin gra parey zannimo pour sa zour labatwar.

⁶ Zot in kondann e touy dimoun inosan, ki pa'n montre okenn rezistans.

Pasyans ek Lapriyer

⁷ Mon bann frer! Pran pasyans ziska retour Senyer. Gete koman en fermye i espere avek pasyans, ki later i prodwir son rekolt presye: I esper avek pasyans, premye sezon lapli ek dernyen sezon lapli.

⁸ Demenm, zot osi, pran pasyans. Gard kouraz, akoz zour retour nou Senyer i pros.

⁹ Mon bann frer! Pa bezwen plenny kont kanmarad, pour zot pa ganny zize. Ziz i pros pou aparet; i devan laport.

¹⁰ Mon bann frer! Pran pour legzanp, lasoufrans ek pasyans bann profet ki'n anons mesaz Senyer.

¹¹ Nou deklar zot byennere akoz zot i'n reste fidel. Zot in antann koz lo pasyans Zob. Zot in war sa ki Senyer in fer pour li alafen. Annefe, Senyer i ranpli avek labonte ek konpasyon.

¹² Me avan tou, mon bann frer! Pa bezwen fer serman ni par lesyel, ni par later, ni par okenn fason. Zot wi, i devre wi, e zot non, i devre non, pour ki zot pa tonm anba zizman Bondye.

¹³ Eski i annan ki soufer parmi zot? I devre priye. Eski i annan ki dan lazwa? I devre sant kantik.

¹⁴ Eski i annan ki malad parmi zot? I devre apel bann ansyen dan Legliz, ki ava priy pour li. Zot ava fer en lonksyon avek delwil lo li, lo non Senyer.

¹⁵ Lapriyer fer avek lafwa, ava sov sa malad, e Senyer ava donn li lasante. Si i'n komet okenn pese, i ava ganny pardonnen.

¹⁶ Alor, konfes zot pese avek kanmarad, priy pour kanmarad, pour ki zot ava ganny gerizon. Lapriyer senser en dimoun zis, i fer bokou lefe.

¹⁷ Eli ti en zonm ki ti annan menm natir ki nou: I ti priy avek bokou lafwa pour ki lapli pa tonbe e lapli pa ti tonbe lo later pandan 3 an edmi.

¹⁸ Answit, i ti priy ankor e lesyel ti donn lapli, e later ti prodwi son fri.

¹⁹ Mon bann frer! Si enn parmi zot in elwanny li avek laverite, e si en lot i ranmenn li,

²⁰ rapel sa byen: Sa enn ki ranmenn en peser lo bon semen e fer li abandonn son lerer, i pou sov en lavi dan lanmor. I pou ganny pardonnen bokou pese.