Let Zak 3 - Labib An Kreol Seselwa

Lalang

¹ Mon bann frer! Fodre pa ki parmi zot, bokou i oule vin ansennyan. Koman zot konnen, nou, bann ansennyan, nou pou ganny zize pli severman ki lezot.

² Nou tou, nou komet lerer dan plizyer mannyer. Si en dimoun pa zanmen komet lerer dan sa ki i dir, i en dimoun parfe ki kapab kontrol son lekor antye.

³ Nou met en labrid dan labous seval pour fer li obei nou. Konmsa, nou kapab kontrol son lekor antye.

⁴ Pran legzanp en bato: Menm si i gro e i ganny pouse par gro divan, i kapab ganny dirize par en pti gouvernay. I pou al dan nenport direksyon ki son kaptenn i oule anmenn li.

⁵ Demenm, lalang i en pti manm dan lekor. Me i kapab vant son lekor lo size gran keksoz enportan. Ou kapab osi mazinen, koman en pti dife i kapab brile e detri en gran lafore.

⁶ Lalang osi i parey en dife. I en lemonn lemal ki'n ganny enstale dan nou lekor e i sali nou lekor antye. I met dife dan nou legzistans antye, avek en dife ki sorti depi lanfer.

⁷ Tou bann lespes zannimo ek zwazo, reptil ek pwason, zot kapab ganny donte. Annefe, zot ganny donte par zonm.

⁸ Me personn pa kapab dont lalang. Lalang i an mouvman san kontrol, ranpli avek pwazon vyolan.

⁹ Avek lalang nou loue Senyer, nou Papa, me nou osi modi bann et imen ki'n ganny kree dan resanblans Bondye.

¹⁰ Benediksyon ek malediksyon i sorti dan menm labous. Mon bann frer! Sa pa devre arive.

¹¹ Eski dan menm sours e par menm louvertir, i kapab sorti delo dou ek delo anmer?

¹² Mon bann frer! Eski en pye fig i kapab raport zoliv, e en pye rezen raport fig? Demenm, en sours delo sale pa kapab prodwi delo dou.

Lasazes ki Sorti dan Lesyel

¹³ Lekel parmi zot ki saz e annan disernman? I devre prouv li par son bon mannyer viv, par son bann bon aksyon fer avek douser ek lasazes.

¹⁴ Me si zot leker i ranpli avek en zalouzi anmer ek en lespri rivalite, aret vant zot lekor koman bann saz; aret fer ditor laverite par zot mansonz.

¹⁵ En lasazes parey, pa sorti dan lesyel, me i lasazes lemonn. I pa spirityel; i sorti kot dyab.

¹⁶ La kot i annan zalouzi ek lespri rivalite, i annan dezord ek toudsort move keksoz.

¹⁷ Me lasazes ki sorti dan lesyel i premyerman pir. I kontan lape, i modere, pare pour met dakor. I ranpli avek pitye ek bon aksyon, san preferans e san lipokrizi.

¹⁸ Fri lazistis i ganny senmen dan lape pour bann ki travay pour lape.