Let Zak 2 - Labib An Kreol Seselwa

Pa Fer Preferans

¹ Mon bann frer! Zot ti krwar dan nou glorye Senyer Zezi-Kri, zot pa devre fer preferans pour personn.

² Sipoze ki en zonm ris avek bag annor e byen abiye, i antre dan ou lasanble. Anmenmtan, en zonm pov dan lenz sal e desire i antre.

³ Ou port ou latansyon pour sa enn ki byen abiye e ou dir li: Asiz isi, dan sa bon plas, tandis ki avek sa pov, ou dir: Reste debout, oubyen: Asiz ater la kot mon lipye.

⁴ Ou pe fer preferans ant zot e ou zizman i baze lo bann move rezonnman.

⁵ Mon bann frer byenneme! Ekoute: Bondye in swazir dimoun ki pov dan lemonn, pour fer zot ris dan lafwa, e vin bann zeritye Rwayonm ki i'n promet bann ki kontan li.

⁶ Me zot, zot dezonor bann pov. Pa bann ris ki eksplwat zot e ki trenn zot devan ziz?

⁷ Sanmenm sa bann dimoun ki koz mal kont sa zoli non ki zot ti gannyen.

⁸ Byen sir, zot fer byen si zot obei lalwa Rwayonm Bondye. Parey Lekritir i deklare: Ou devre kontan ou prosen parey ou prop lekor.

⁹ Me si zot fer preferans, zot pe fer en pese, e Lalwa i kondann zot, akoz zot dezobei Lalwa.

¹⁰ Annefe, si en dimoun i met an pratik tou bann komannman, me i mank en pwen ladan, i koupab anver tou leres.

¹¹ Annefe, sa enn ki'n dir: Pa komet adilter, i'n osi dir: Pa komet okenn krim. Si ou pa komet adilter, me ou komet en krim, ou dezobei Lalwa.

¹² Alor, koze e azir koman dimoun ki pou ganny zize par en lalwa ki rann lib.

¹³ Annefe, Bondye pou san pitye kan i pou ziz sa enn ki pa'n pran pitye pour lezot. Me sa enn ki annan pitye, napa nanryen pour li per zizman.

Lafwa ek Aksyon

¹⁴ Mon bann frer! Ki benefis i annan pour en dimoun dir ki i annan lafwa, si i pa prouve par bann aksyon? Eski sa lafwa i kapab sov li?

¹⁵ Sipoze en frer oubyen en ser napa lenz oubyen ase manze tou le zour.

¹⁶ Ki i abouti li, si ou dir li: Al anpe! Pa ganny frwa, bonn apeti, me ou pa donn li nanryen?

¹⁷ I parey pour lafwa: Si i pa akonpannyen par aksyon, i en keksoz mor.

¹⁸ Petet en dimoun ava dir: Serten i annan lafwa e mwan, mon annan aksyon. Mon ava reponn li: Montre mwan ou lafwa san aksyon, e mwan, mon ava montre ou mon lafwa par mon aksyon.

¹⁹ Ou krwar ki i annan en sel Bondye; sa i byen. Me bann demon osi zot krwar e zot tranble.

²⁰ Enbesil! Oule mon prouv ou ki lafwa san aksyon napa valer?

²¹ Nou papa Abrahanm, pa i ti ganny rekonnet zis par son aksyon, kan i ti ofer son garson Izaak lo lotel?

²² Ensi, ou war ki son lafwa ti travay ansanm avek son aksyon e son lafwa ti ganny konplete par son bann aksyon.

²³ Ensi, sa ki Lekritir i deklare, ti ganny akonpli: Abrahanm ti krwar dan Bondye. Akoz son lafwa i ti ganny konsidere koman zis. I ti ganny apele zanmi Bondye.

²⁴ Ou war alor, ki par son aksyon, en dimoun i ganny rekonnet koman zis devan Bondye, me pa zis par son lafwa.

²⁵ Demenm, Rahab, sa prostitye ti ganny rekonnet koman zis devan Bondye par son bann aksyon. I ti resevwar bann mesaze ki i ti ede e fer zot pran en lot semen.

²⁶ Parey en lekor san lespri i mor, demenm, lafwa san aksyon i mor.